ಇತ್ತೀಚಿನ ಸುದ್ದಿ
ಬಿಜೆಪಿಯಿಂದ ಪ್ರಜೆಗಳ ಮೂಲಭೂತ ಹಕ್ಕು ಕಸಿಯಲು ಯತ್ನ: ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಪದ್ಮರಾಜ್ ಆರ್.ಪೂಜಾರಿ ಆರೋಪ
07/10/2026, 19:52
ಮಂಗಳೂರು(reporterkarnataka.com): ಬಿಜೆಪಿಯು ಚುನಾವಣಾಧಿಕಾರಿಗಳಿಗೆ ಎಸ್‌ಐಆರ್ ಫಾರಂ ನಂ.7 ಸಲ್ಲಿಸುವ ಮೂಲಕ ಜಿಲ್ಲೆಯ ಅರ್ಹ ಮತದಾರರನ್ನು ಮತದಾರರ ಪಟ್ಟಿಯಿಂದ ತೆಗೆದು ಹಾಕುವ ಕೆಲಸವನ್ನು ಮಾಡುತ್ತಿದ್ದು, ಇದು ಪ್ರಜೆಗಳ ಮೂಲಭೂತ ಹಕ್ಕನ್ನು ಕಸಿಯುವ ಹುನ್ನಾರ ಎಂದು ಕಾಂಗ್ರೆಸ್ ಜಿಲ್ಲಾಧ್ಯಕ್ಷ ಪದ್ಮರಾಜ್ ಆರ್.ಪೂಜಾರಿ ಆರೋಪಿಸಿದರು.
ಬುಧವಾರ ನಗರದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು,ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡ, ಕ್ರೈಸ್ತ ಹಾಗೂ ಮುಸ್ಲಿಂ ಸಮುದಾಯವನ್ನು ಗುರಿಯಾಗಿಸಿಕೊಂಡು ಈ ಕೆಲಸ ನಡೆಯುತ್ತಿದೆ. ಜಿಲ್ಲೆಯಲ್ಲಿ ಈಗಾಗಲೇ ಮೂರು ಕಡೆ ಎಫ್‌ಐಆರ್ ದಾಖಲಾಗಿದೆ ಎಂದರು.
ರಾಜ್ಯವನ್ನು ಆಳ್ವಿಕೆ ಮಾಡಿದವರು ಪೊಲೀಸ್ ಠಾಣೆಗೆ ನುಗ್ಗುವ ಹೇಳಿಕೆ ನೀಡುತ್ತಿದ್ದಾರೆ. ನೀವು ಮಾಡುತ್ತಿರುವ ಕೆಲಸ ನೈತಿಕವಾಗಿದೆಯೇ? ಕೇಂದ್ರ ಸರ್ಕಾರ ಅಣತಿಯಂತೆ ಸಂಸದರು, ಮುಖಂಡರು ಈ ಕೃತ್ಯದಲ್ಲಿ ಕೈ ಜೋಡಿಸಿದ್ದಾರೆ. ನಿಮ್ಮ ಮನಸ್ಥಿತಿಯನ್ನು ಜನ ಅರ್ಥ ಮಾಡಿಕೊಂಡಿದ್ದಾರೆ ಎಂದರು.
ಕಾವೂರು ಪೊಲೀಸ್ ಠಾಣೆಯಲ್ಲಿ 2 ಹಾಗೂ ಬೆಳ್ತಂಗಡಿ ಠಾಣೆಯಲ್ಲಿ 1 ಪ್ರಕರಣ ದಾಖಲಾಗಿದೆ. ಕಿಶನ್ ಎಂಬುವರು 45 ಜನರ ಹೆಸರನ್ನು ಮತದಾರರ ಪಟ್ಟಿಯಿಂದ ರದ್ದು ಮಾಡಲು ಕಳುಹಿಸಿದ್ದಾರೆ. ರಿತೇಶ್ 9, ಯುವರಾಜ್ 10 ಹಾಗೂ ಶಶಿಕಲಾ 4 ಅರ್ಹ ಮತದಾರರನ್ನು ರದ್ದು ಮಾಡಲು ಚುನಾವಣಾಧಿಕಾರಿಯವರಿಗೆ ಫಾರಂ ನಂ.7 ಕಳುಹಿಸಿದ್ದಾರೆ. ಸಂತ್ರಸ್ತರೇ ದೂರು ದಾಖಲಿಸಿದ್ದಾರೆ ಎಂದು ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ ಹೇಳಿದರು.
ನೈಜ ಮತದಾರರ ಒಂದು ಹೆಸರು ಕೂಡಾ ಪಟ್ಟಿಯಿಂದ ರದ್ದಾಗದಂತೆ ಕಾಂಗ್ರೆಸ್ ಎಚ್ಚರಿಕೆ ವಹಿಸುತ್ತಿದೆ. ಜಿಲ್ಲೆಯ ಎಲ್ಲಾ ಬೂತ್ ಮಟ್ಟದಲ್ಲಿ ನಿಗಾ ಇಡಲಾಗಿದೆ. ಬಿಜೆಪಿ ಕವರಿಂಗ್ ಲೆಟರ್‌ನಲ್ಲೇ ಇಂತಹ ನಕಲಿ ಫಾರಂ 7 ನಮೂನೆಗಳನ್ನು ಸಲ್ಲಿಸುತ್ತಿರುವುದು ಗಮನಕ್ಕೆ ಬಂದಿದೆ ಎಂದವರು ನುಡಿದರು.
ಮುಖಂಡರಾದ ಶಶಿಧರ್ ಹೆಗ್ಡೆ, ಎಸ್.ಅಪ್ಪಿ, ಅಶೋಕ್ ಡಿ.ಕೆ., ಮೋಹನ್ ಕೋಟ್ಯಾನ್, ಜೆ.ಅಬ್ದುಲ್ ಸಲೀಂ, ಲಾರೆನ್ಸ್ ಡಿಸೋಜಾ, ನೀರಜ್ ಪಾಲ್, ಮನೋರಾಜ್ ರಾಜೀವ, ಟಿ.ಕೆ.ಸುಧೀರ್, ಉದಯ್ ಕುಂದರ್, ಭಾಸ್ಕರ್ ರಾವ್ ಮೊದಲಾದವರಿದ್ದರು.
