ಇತ್ತೀಚಿನ ಸುದ್ದಿ
ವಿನಾಯಕ ಬಾಳಿಗ ಹತ್ಯೆ ಪ್ರಕರಣ: ಬಾಳಿಗ ಸಹೋದರಿ ರಾಜ್ಯಪಾಲರ ಭೇಟಿ; ವಿಶೇಷ ತನಿಖಾ ತಂಡ ನೇಮಿಸಲು ಮನವಿ
16/03/2022, 19:55
ಮಂಗಳೂರು(reporterkarnataka.com): ಮಾಹಿತಿ ಹಕ್ಕು ಕಾರ್ಯಕರ್ತ ವಿನಾಯಕ ಬಾಳಿಗಾ ಕೊಲೆ ಪ್ರಕರಣದ ತನಿಖೆಗೆ ವಿಶೇಷ ತನಿಖಾ ತಂಡ(SIT)ವನ್ನು ನೇಮಿಸುವಂತೆ ಬಾಳಿಗಾ ಅವರ ಸಹೋದರಿ ರಾಜ್ಯಪಾಲ ಥಾವರ್ ಚಂದ್ ಗೆಹ್ಲಾಟ್ ಅವರನ್ನು ಭೇಟಿಯಾಗಿ ಮನವಿ ಸಲ್ಲಿಸಿದ್ದಾರೆ.
ನಗರದ ಸರ್ಕ್ಯೂಟ್ ಹೌಸ್ ನಲ್ಲಿ ಮಂಗಳವಾರ ಬೆಳಗ್ಗೆ ಸುಮಾರು 8.20ರ ವೇಳೆಗೆ ವಿನಾಯಕ ಬಾಳಿಗ ಅವರ ಸಹೋದರಿ ಅನುರಾಧಾ ಬಾಳಿಗ ಅವರು ರಾಜ್ಯಪಾಲರನ್ನು ಭೇಟಿಯಾದರು. ಈ ಸಂದರ್ಭದಲ್ಲಿ ಅನುರಾಧಾ ಬಾಳಿಗ ಅವರು ಹತ್ಯೆಗೀಡಾದ ತನ್ನ ಸಹೋದರನಿಗೆ ನ್ಯಾಯ ಒದಗಿಸುವ ನಿಟ್ಟಿನಲ್ಲಿ ವಿಶೇಷ ತನಿಖಾ ತಂಡ ನೇಮಿಸುವಂತೆ ರಾಜ್ಯಪಾಲರಿಗೆ ಮನವಿ ಮಾಡಿದರು.
ಈ ಕುರಿತು ರಿಪೋರ್ಟರ್ ಕರ್ನಾಟಕ ಅನುರಾಧಾ ಬಾಳಿಗ ಅವರನ್ನು ಸಂಪರ್ಕಿಸಿದಾಗ, ತಾನು ಮಂಗಳವಾರ ಬೆಳಗ್ಗೆ ಸರ್ಕಿಟ್ ಹೌಸ್ ನಲ್ಲಿ ರಾಜ್ಯಪಾಲರನ್ನು ಭೇಟಿಯಾಗಿರುವುದನ್ನು ದೃಢಪಡಿಸಿದರು.
ಮನವಿ ಸ್ವೀಕರಿಸಿ ರಾಜ್ಯಪಾಲರು ಬೇಡಿಕೆಯನ್ನು ಪರಿಶೀಲಿಸಿ ತನ್ನಿಂದ ಆಗುವಂತಹ ಸಹಾಯವನ್ನು ಮಾಡುವ ಭರವಸೆ ನೀಡಿದ್ದಾರೆಂದು ಅನುರಾಧಾ ಬಾಳಿಗ ತಿಳಿಸಿದ್ದಾರೆ.
