ಇತ್ತೀಚಿನ ಸುದ್ದಿ
ತುಂಬೆ ಗ್ರೂಪ್ನ ಮಾಧ್ಯಮ ವಿಭಾಗದಿಂದ ‘ಗಲ್ಫ್ ಎಜುಕೇಶನ್’ ಎಂಬ ಹೊಸ ಮುದ್ರಣ ಮತ್ತು ಡಿಜಿಟಲ್ ಪತ್ರಿಕೆ ಬಿಡುಗಡೆ
28/08/2026, 20:44
ತುಂಬೆ(reporterkarnataka.com):ಗಲ್ಫ್ ಪ್ರದೇಶದ ವೇಗವಾಗಿ ಬೆಳೆಯುತ್ತಿರುವ ಶೈಕ್ಷಣಿಕ ಕ್ಷೇತ್ರವನ್ನು ಕೇಂದ್ರೀಕರಿಸಿ ‘ಗಲ್ಫ್ ಎಜುಕೇಶನ್’ ಎಂಬ ಹೊಸ ಮುದ್ರಣ ಮತ್ತು ಡಿಜಿಟಲ್ ಪತ್ರಿಕೆಯನ್ನು ತುಂಬೆ ಗ್ರೂಪ್ನ ಮಾಧ್ಯಮ ವಿಭಾಗವಾದ ‘ತುಂಬೆ ಮೀಡಿಯಾ’ ಬಿಡುಗಡೆ ಮಾಡಿದೆ.
ಇದರೊಂದಿಗೆ ತುಂಬೆ ಮೀಡಿಯಾದ ಪ್ರಕಟಣೆಗಳ ಸಂಖ್ಯೆ 5ಕ್ಕೇರಿದ್ದು, ತನ್ನ ಮಾಧ್ಯಮ ಕ್ಷೇತ್ರವನ್ನು ಮತ್ತಷ್ಟು ವಿಸ್ತರಿಸಿದೆ. ಈ ಸಂಸ್ಥೆಯು ಈಗಾಗಲೇ ‘ಹೆಲ್ತ್ ಮ್ಯಾಗಜೀನ್’ ಮತ್ತು ‘ಲಿವಿಂಗ್ ಗಲ್ಫ್’ ಪತ್ರಿಕೆಗಳನ್ನು ನಡೆಸುತ್ತಿದ್ದು, ಶೀಘ್ರದಲ್ಲೇ ‘ಗಲ್ಫ್ ಪೆಟ್ಸ್ & ವೆಟ್ಸ್’ ಹಾಗೂ ‘ಗಲ್ಫ್ ಕಲಿನರಿ & ಹಾಸ್ಪಿಟಾಲಿಟಿ’ ಎಂಬ ಎರಡು ಹೊಸ ಪತ್ರಿಕೆಗಳನ್ನು ಬಿಡುಗಡೆ ಮಾಡಲಿದೆ.
ಗಲ್ಫ್ ಪ್ರದೇಶದ ಶಿಕ್ಷಣ ಕ್ಷೇತ್ರದಲ್ಲಿ ತಂತ್ರಜ್ಞಾನ, ಕೃತಕ ಬುದ್ಧಿಮತ್ತೆ (AI) ಮತ್ತು ಮೂಲಸೌಕರ್ಯ ಹೂಡಿಕೆಗಳ ಮೂಲಕ ಬೃಹತ್ ಬದಲಾವಣೆಗಳು ನಡೆಯುತ್ತಿರುವ ಸಮಯದಲ್ಲಿ ಈ ಪತ್ರಿಕೆಯನ್ನು ತರಲಾಗಿದೆ. ಈ ಪತ್ರಿಕೆಯು ಶಾಲೆಗಳು, ವಿಶ್ವವಿದ್ಯಾಲಯಗಳು, ಶಿಕ್ಷಕರು, ವಿದ್ಯಾರ್ಥಿಗಳು, ಪೋಷಕರು ಹಾಗೂ ನೀತಿ ನಿರೂಪಕರನ್ನು ಒಳಗೊಂಡ ಶೈಕ್ಷಣಿಕ ಸಮುದಾಯಕ್ಕೆ ನವೀನ ಮಾಹಿತಿಯನ್ನು ಒದಗಿಸಲಿದೆ. ಇದರಲ್ಲಿ ಕ್ಲಾಸ್ರೂಮ್, ಹೋಮ್, ಫ್ಯೂಚರ್, ಕ್ಯಾಂಪಸ್ ಮತ್ತು ವರ್ಲ್ಡ್ ಎಂಬ ವಿಶೇಷ ವಿಭಾಗಗಳಿದ್ದು, ತರಗತಿಯ ನಾವೀನ್ಯತೆ, ಭವಿಷ್ಯದ ಕೌಶಲ್ಯಗಳು, ಉನ್ನತ ಶಿಕ್ಷಣ ಮತ್ತು ಜಾಗತಿಕ ಶೈಕ್ಷಣಿಕ ಬೆಳವಣಿಗೆಗಳನ್ನು ಒಳಗೊಳ್ಳಲಿದೆ.
ಗಲ್ಫ್ ಪ್ರದೇಶದ ಶಿಕ್ಷಣ ಕ್ಷೇತ್ರವು ಅತ್ಯಂತ ಕ್ರಿಯಾಶೀಲವಾಗಿದ್ದು, ಶಿಕ್ಷಣ ತಜ್ಞರು, ವಿದ್ಯಾರ್ಥಿಗಳು ಮತ್ತು ಸಂಸ್ಥೆಗಳಿಗೆ ಉಪಯುಕ್ತವಾಗುವ ಮಾಹಿತಿಯನ್ನು ಒಂದೇ ವೇದಿಕೆಯಲ್ಲಿ ನೀಡಲು ಈ ಪ್ರಯತ್ನ ಮಾಡಲಾಗಿದೆ ಎಂದು ತುಂಬೆ ಗ್ರೂಪ್ ಸಂಸ್ಥಾಪಕ ಅಧ್ಯಕ್ಷ ಡಾ. ತುಂಬೆ ಮೊಹಿದ್ದೀನ್ ತಿಳಿಸಿದ್ದಾರೆ. ವೆಬ್ಸೈಟ್ ಮತ್ತು ಸಾಮಾಜಿಕ ಮಾಧ್ಯಮಗಳ ಬೆಂಬಲದೊಂದಿಗೆ ಮುದ್ರಣ ಹಾಗೂ ಡಿಜಿಟಲ್ ರೂಪದಲ್ಲಿ ಈ ಪತ್ರಿಕೆ ಲಭ್ಯವಿರಲಿದ್ದು, ಇದರೊಂದಿಗೆ ತುಂಬೆ ಮೀಡಿಯಾ ಸಂಸ್ಥೆಯು ಬ್ರ್ಯಾಂಡಿಂಗ್, ಸಾರ್ವಜನಿಕ ಸಂಪರ್ಕ (PR) ಮತ್ತು ಕಾರ್ಯಕ್ರಮ ಆಯೋಜನೆಯ ಮಾಧ್ಯಮ ಸೇವೆಗಳನ್ನು ಒದಗಿಸುತ್ತಿದೆ.
