ಇತ್ತೀಚಿನ ಸುದ್ದಿ
ತುಂಬೆ | ಕೈಕೊಟ್ಟ ರಾಮಲ್ ಕಟ್ಟೆ ಪಂಪ್ ಹೌಸ್ ಟ್ರಾನ್ಸ್ ಫಾರ್ಮರ್: ಮಂಗಳೂರಿಗೆ ನೀರು ಸರಬರಾಜಿನಲ್ಲಿ ವ್ಯತ್ಯಯ
19/08/2026, 20:12
ಅನುಷ್ ಪಂಡಿತ್ ಮಂಗಳೂರು
info.reporterkarnataka@gmail.com
ಮಂಗಳೂರು ನಗರಕ್ಕೆ ನೀರು ಸರಬರಾಜು ಮಾಡುವ ತುಂಬೆ ವೆಂಟೆಂಡ್ ಡ್ಯಾಮ್ ಗೆ ಸಂಬಂಧಪಟ್ಟ ಟ್ರಾನ್ಸ್ ಫಾರ್ಮರ್ ಕೆಟ್ಟು ಹೋಗಿದ್ದು, ನೀರು ಸರಬರಾಜಿನಲ್ಲಿ ತೊಂದರೆ ಉಂಟಾಗಿದೆ.
ತುಂಬೆ ರಾಮಲ್ ಕಟ್ಟೆಯಲ್ಲಿರುವ ಪಂಪ್ ಹೌಸ್ ಗೆ ಸಂಬಂಧಿಸಿದ 11 ಕೆವಿ ಸಾಮರ್ಥ್ಯದ ಟ್ರಾನ್ಸ್ ಫಾರ್ಮರ್ ಕಳೆದ ರಾತ್ರಿ ಕೆಟ್ಟು ಹೋಗಿತ್ತು. ಇದರ ಪರಿಣಾಮ ನೀರು ಸರಬರಾಜಿನಲ್ಲಿ ಕೊಂಚ ಪ್ರಮಾಣದ ವ್ಯತ್ಯಯ ಉಂಟಾಗಿ ಮಂಗಳೂರಿನ ಕೆಲವು ಭಾಗಗಳಲ್ಲಿ ನೀರಿನ ಸಮಸ್ಯೆ ಉಂಟಾಗಿತ್ತು. ಕರಾವಳಿಯಲ್ಲಿ ಮತ್ತೆ ಎರಡು ದಿನಗಳಿಂದ ನಿರಂತರ ಮಳೆ ಸುರಿಯುತ್ತಿರುವ ಪರಿಣಾಮ ವಿದ್ಯುತ್ ಕೇಬಲ್ ನಲ್ಲಿ ದೋಷ ಕಂಡು ಬಂದು ಟ್ರಾನ್ಸ್ ಫಾರ್ಮರ್ ಕೆಟ್ಟು ಹೋಗಿತ್ರು.
ಕಳೆದ ರಾತ್ರಿ ಟ್ರಾನ್ಸ್ ಫಾರ್ಮರ್ ಕೈಕೊಟ್ಟಿರುವುದರಿಂದ ರಾಮಲ್ ಕಟ್ಟೆಯಲ್ಲಿರುವ ಪಂಪ್ ಹೌಸ್ ನ ಗ್ರೌಂಡ್ ಟ್ಯಾಂಕ್ ನಲ್ಲಿ ಸಂಗ್ರಹಿಸಲ್ಪಟ್ಟ ನೀರು ಸರಬರಾಜಿಗೆ ತೊಂದರೆ ಉಂಟಾಗಿತ್ತು. ಇದರಿಂದ ಮಂಗಳೂರಿನ ಹೃದಯಭಾಗವಾದ ಹಂಪನಕಟ್ಟೆ, ಸ್ಟೇಟ್ ಬ್ಯಾಂಕ್, ಪಾಂಡೇಶ್ವರ ಪರಿಸರದಲ್ಲಿ ನೀರಿನ ಸಮಸ್ಯೆ ಉಂಟಾಗಿತ್ತು. ಆದರೆ, ಇಂದು(ಬುಧವಾರ) ಟ್ರಾನ್ಸ್ ಫಾರ್ಮರ್ ದುರಸ್ತಿ ಕಾರ್ಯ ನಡೆದಿದ್ದು, ಮತ್ತೆ ನೀರು ಸರಬರಾಜು ಪುನಾರಂಭಗೊಂಡಿದೆ ಎಂದು ಮಂಗಳೂರು ಮಹಾನಗರಪಾಲಿಕೆ ಮೂಲಗಳು ತಿಳಿಸಿವೆ.
