ಇತ್ತೀಚಿನ ಸುದ್ದಿ
*ಬೆಳ್ತಂಗಡಿ: ನಕಲಿ ನೋಟು ತಯಾರಿಕಾ ಕೇಂದ್ರದ ಮೇಲೆ ಪೊಲೀಸರ ದಾಳಿ; 7 ಮಂದಿ ಬಂಧನ*
16/07/2026, 18:44
*ಅಡಿಂಜೆ ಎಂಬಲ್ಲಿನ ಅತ್ಯಂತ ನಿರ್ಜನ ಪ್ರದೇಶದಲ್ಲಿದ್ದ ಬಾಡಿಗೆ ಮನೆಯೊಂದರಲ್ಲಿ ರಹಸ್ಯವಾಗಿ ನಡೆಯುತ್ತಿದ್ದ ಬೃಹತ್ ನಕಲಿ ನೋಟು ತಯಾರಿಕಾ ಮಾಫಿಯಾ*
*ನಕಲಿ ನೋಟು ಮುದ್ರಣ ಯಂತ್ರಗಳು, ಹೈ-ಕ್ವಾಲಿಟಿ ಕಾಗದದ ಬಂಡಲ್ಗಳು ವಶ*
ಬೆಳ್ತಂಗಡಿ(reporterkarnataka.com): ಬೆಳ್ತಂಗಡಿ ಪೊಲೀಸ್ ಠಾಣಾ ವ್ಯಾಪ್ತಿಯ ಅಡಿಂಜೆ ಎಂಬಲ್ಲಿ ಬಾಡಿಗೆ ಮನೆಯೊಂದರಲ್ಲಿ ರಹಸ್ಯವಾಗಿ ನಡೆಯುತ್ತಿದ್ದ ಬೃಹತ್ ನಕಲಿ ನೋಟು ತಯಾರಿಕಾ ಮಾಫಿಯಾವನ್ನು ಪೊಲೀಸರು ಭೇದಿಸಿದ್ದು, 7 ಮಂದಿಯನ್ನು ಬಂಧಿಸಿದ್ದಾರೆ.
ಖಚಿತ ಮಾಹಿತಿ ಮೇರೆಗೆ ದಾಳಿ ನಡೆಸಿರುವ ಪೊಲೀಸರು, ನಕಲಿ ನೋಟು ಮುದ್ರಣ ಯಂತ್ರಗಳು, ಹೈ-ಕ್ವಾಲಿಟಿ ಕಾಗದದ ಬಂಡಲ್ಗಳು ಹಾಗೂ ನಕಲಿ ನೋಟುಗಳ ಸಮೇತ 7 ಮಂದಿ ಅಂತರರಾಜ್ಯ ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಬಂಧಿತ ಆರೋಪಿಗಳು ಕೇರಳ ಹಾಗೂ ದಕ್ಷಿಣ ಕನ್ನಡ ಜಿಲ್ಲೆಯ ವಿವಿಧ ಭಾಗಗಳಿಗೆ ಸೇರಿದವರಾಗಿದ್ದು, ಜಾಲದ ಮುಖಂಡರ ಪತ್ತೆಗಾಗಿ ಪೊಲೀಸರು ಜಾಲ ಬೀಸಿದ್ದಾರೆ. ಬೆಳ್ತಂಗಡಿ ತಾಲೂಕಿನ ಅಡಿಂಜೆಯ ಅತ್ಯಂತ ನಿರ್ಜನ ಪ್ರದೇಶದಲ್ಲಿದ್ದ ಬಾಡಿಗೆ ಮನೆಯೊಂದನ್ನು ಈ ಮಾಫಿಯಾ ತನ್ನ ಅಡ್ಡೆಯನ್ನಾಗಿ ಮಾಡಿಕೊಂಡಿತ್ತು.
ಯಾರಿಗೂ ಸಂಶಯ ಬಾರದಂತೆ ಕಳೆದ ಕೆಲವು ಸಮಯದಿಂದ ಇಲ್ಲಿ ನಕಲಿ ನೋಟುಗಳನ್ನು ಮುದ್ರಿಸಿ ಮಾರುಕಟ್ಟೆಗೆ ಸಪ್ಲೈ ಮಾಡಲು ಸ್ಕೆಚ್ ಹಾಕಲಾಗಿತ್ತು. ಇತ್ತೀಚೆಗೆ ದಕ್ಷಿಣ ಕನ್ನಡ ಹಾಗೂ ಕೇರಳ ಗಡಿ ಭಾಗಗಳಲ್ಲಿ ನಕಲಿ ನೋಟುಗಳು ಚಲಾವಣೆಯಾಗುತ್ತಿರುವ ಬಗ್ಗೆ ಲಭ್ಯವಾದ ಖಚಿತ ಸುಳಿವಿನ ಮೇರೆಗೆ ಬೆಳ್ತಂಗಡಿ ಪೊಲೀಸ್ ಇನ್ಸ್ಪೆಕ್ಟರ್ ನೇತೃತ್ವದ ವಿಶೇಷ ತಂಡ ಈ ಅಡ್ಡೆಯ ಮೇಲೆ ಧೀಡೀರ್ ದಾಳಿ ನಡೆಸಿದೆ.ದಾಳಿಯ ವೇಳೆ ನೋಟು ತಯಾರಿಕೆಗೆ ಬಳಸುತ್ತಿದ್ದ ಅತ್ಯಾಧುನಿಕ ಸ್ಕ್ಯಾನರ್ ಕಂ ಮುದ್ರಣ ಯಂತ್ರಗಳು, ಅಸಲಿ ನೋಟುಗಳನ್ನೇ ಹೋಲುವ ವಿಶೇಷ ಗುಣಮಟ್ಟದ ಕಾಗದದ ಬಂಡಲ್ಗಳು ಹಾಗೂ ಈಗಾಗಲೇ ಮುದ್ರಿಸಲಾಗಿದ್ದ ನಕಲಿ ನೋಟುಗಳನ್ನು ವಶಪಡಿಸಿಕೊಳ್ಳಲಾಗಿದೆ.
