ಇತ್ತೀಚಿನ ಸುದ್ದಿ
ಗಲ್ಫ್ ಮೆಡಿಕಲ್ ಯೂನಿವರ್ಸಿಟಿ 2026–27ನೇ ಶೈಕ್ಷಣಿಕ ವರ್ಷಕ್ಕೆ ಚಾಲನೆ: ಆರೋಗ್ಯ ವೃತ್ತಿ ಶಿಕ್ಷಣದಲ್ಲಿ ಅತ್ಯುತ್ತಮ ಗುಣಮಟ್ಟ ಕಾಯ್ದುಕೊಳ್ಳುವ ಬದ್ಧತೆ ಪುನರುಚ್ಚಾರ
09/09/2026, 11:59
ಮಂಗಳೂರು(reporterkarnataka.com): ಗಲ್ಫ್ ಮೆಡಿಕಲ್ ಯೂನಿವರ್ಸಿಟಿ (GMU) ಆಗಸ್ಟ್ 31ರಂದು 2026–27ರ ಹೊಸ ಶೈಕ್ಷಣಿಕ ವರ್ಷಕ್ಕೆ ಅಧಿಕೃತವಾಗಿ ಚಾಲನೆ ನೀಡಿದೆ.
ಆರೋಗ್ಯ ವೃತ್ತಿ ಶಿಕ್ಷಣದಲ್ಲಿ ಶೈಕ್ಷಣಿಕ ಪ್ರಗತಿ, ನಾವೀನ್ಯತೆ ಮತ್ತು ಸುಧಾರಣೆಗಾಗಿ ವಿದ್ಯಾರ್ಥಿಗಳು ಹಾಗೂ ಅಧ್ಯಾಪಕರನ್ನು ವಿಶ್ವವಿದ್ಯಾಲಯವು ಆತ್ಮೀಯವಾಗಿ ಸ್ವಾಗತಿಸಿದೆ.
ಹೊಸ ಶೈಕ್ಷಣಿಕ ವರ್ಷದ ಆರಂಭದಲ್ಲೇ ಕ್ಯಾಂಪಸ್ನಲ್ಲಿ ವಿದ್ಯಾರ್ಥಿಗಳ ಸಂಖ್ಯೆ ಗಣನೀಯವಾಗಿ ಹೆಚ್ಚಾಗಿದ್ದು, ಇದು GMU ನೀಡುವ ಆರೋಗ್ಯ ವೃತ್ತಿ ಶಿಕ್ಷಣದ ಕೋರ್ಸ್ಗಳಿಗೆ ಇರುವ ಹೆಚ್ಚಿನ ಬೇಡಿಕೆಯನ್ನು ಪ್ರತಿಬಿಂಬಿಸುತ್ತದೆ.
“ನಾವು 2026–2027ರ ಶೈಕ್ಷಣಿಕ ವರ್ಷಕ್ಕೆ ನಮ್ಮ ವಿದ್ಯಾರ್ಥಿಗಳು ಮತ್ತು ಅಧ್ಯಾಪಕರನ್ನು ಸ್ವಾಗತಿಸುತ್ತಿದ್ದಂತೆ, ಶೈಕ್ಷಣಿಕ ಶ್ರೇಷ್ಠತೆಯನ್ನು ಹೆಚ್ಚಿಸುವುದು, ಸಂಶೋಧನೆ ಮತ್ತು ನಾವೀನ್ಯತೆಯನ್ನು ಬಲಪಡಿಸುವುದು ಹಾಗೂ ಸ್ಥಳೀಯ ಮತ್ತು ಜಾಗತಿಕ ಹಂತದಲ್ಲಿ ಸಮಾಜದ ಬದಲಾಗುತ್ತಿರುವ ಅಗತ್ಯಗಳನ್ನು ಪೂರೈಸಬಲ್ಲ ಆರೋಗ್ಯ ರಕ್ಷಣಾ ವೃತ್ತಿಪರರನ್ನು ಸಿದ್ಧಪಡಿಸುವುದರತ್ತ ನಮ್ಮ ಗಮನ ನೆಟ್ಟಿದೆ. ನಮಗೆ ಇತ್ತೀಚೆಗೆ ದೊರೆತ ಅಂತಾರಾಷ್ಟ್ರೀಯ ಮಾನ್ಯತೆಗಳು GMUನಲ್ಲಿ ನಡೆಯುತ್ತಿರುವ ಕೆಲಸದ ಗುಣಮಟ್ಟವನ್ನು ಎತ್ತಿಹಿಡಿಯುವುದಲ್ಲದೆ, ನಾವು ತಲುಪಬೇಕಾದ ಗುರಿಯ ಸಾಧನೆಗೆ ಉನ್ನತ ಮಟ್ಟದ ಮಾನದಂಡವನ್ನು ನಿಗದಿಪಡಿಸಿವೆ,” ಎಂದು ಗಲ್ಫ್ ಮೆಡಿಕಲ್ ಯೂನಿವರ್ಸಿಟಿಯ ಕುಲಪತಿ ಪ್ರೊ. ಮಂದಾ ವೆಂಕಟರಮಣ ತಿಳಿಸಿದ್ದಾರೆ.
ಯುಎಇ ಮತ್ತು ಈ ವಲಯದಲ್ಲಿ ಪ್ರಮುಖ ವೈದ್ಯಕೀಯ ಹಾಗೂ ಆರೋಗ್ಯ ವಿಜ್ಞಾನಗಳ ವಿಶ್ವವಿದ್ಯಾಲಯವಾಗಿ ಬೆಳೆಯುತ್ತಿರುವ GMU ಪ್ರಗತಿಯಲ್ಲಿ ಈ ಹೊಸ ಶೈಕ್ಷಣಿಕ ವರ್ಷವು ಮತ್ತೊಂದು ಪ್ರಮುಖ ಮೈಲಿಗಲ್ಲಾಗಿದೆ. ತುಂಬೆ ಗ್ರೂಪ್ನ ಸಂಸ್ಥಾಪಕ ಅಧ್ಯಕ್ಷರಾದ ಡಾ. ತುಂಬೆ ಮೊಯ್ದಿನ್ ಅವರು 1998 ರಲ್ಲಿ ಸ್ಥಾಪಿಸಿದ GMU, ಇಂದು ಶಿಕ್ಷಣ, ಆರೋಗ್ಯ ಸೇವೆ ಮತ್ತು ಸಂಶೋಧನೆಗಳನ್ನು ಒಳಗೊಂಡ ಸಮಗ್ರ ಶೈಕ್ಷಣಿಕ ಆರೋಗ್ಯ ವ್ಯವಸ್ಥೆಯಾಗಿ ಬೆಳೆದಿದೆ.
ವಿಶ್ವವಿದ್ಯಾಲಯದ ಉನ್ನತ ಆಡಳಿತ ಮಂಡಳಿ, ಡೀನ್ಗಳು ಮತ್ತು ವಿಭಾಗೀಯ ಮುಖ್ಯಸ್ಥರ ಸಭೆ ಹಾಗೂ ಸಂವಾದದೊಂದಿಗೆ ಈ ಶೈಕ್ಷಣಿಕ ವರ್ಷ ಆರಂಭಗೊಂಡಿದ್ದು, ಮುಂದಿನ ವರ್ಷದ ಆದ್ಯತೆಗಳು ಮತ್ತು ಕಾರ್ಯತಂತ್ರಗಳನ್ನು ನಿಗದಿಪಡಿಸಲಾಯಿತು. ಶೈಕ್ಷಣಿಕ ವರ್ಷದ ಚಾಲನೆಯ ಭಾಗವಾಗಿ ಡಾ. ತುಂಬೆ ಮೊಯ್ದಿನ್ ಅವರು ವಿವಿಧ ಕಾಲೇಜುಗಳ ಡೀನ್ಗಳನ್ನು ಭೇಟಿಯಾದರು, ಹಾಗೆಯೇ ಉಪಕುಲಪತಿಗಳು ಮತ್ತು ಕಾಲೇಜು ಮುಖ್ಯಸ್ಥರು ಬರುವ ವರ್ಷದ ಶೈಕ್ಷಣಿಕ ಆದ್ಯತೆಗಳು ಮತ್ತು ಯೋಜನೆಗಳನ್ನು ಪರಾಮರ್ಶಿಸಿದರು.
2026–2027ರ ಶೈಕ್ಷಣಿಕ ವರ್ಷದಲ್ಲಿ ಸುಧಾರಿತ ಆರೋಗ್ಯ ವಿಜ್ಞಾನ ಮತ್ತು ಮೂಲಭೂತ ವೈದ್ಯಕೀಯ ಶಿಕ್ಷಣವನ್ನು ಬಲಪಡಿಸುವುದರ ಜೊತೆಗೆ ಡಿಜಿಟಲ್ ಹೆಲ್ತ್, ಬಹುಶಿಸ್ತೀಯ ಕಲಿಕೆ (interdisciplinary learning), ಸಂಶೋಧನೆ ಮತ್ತು ನಾವೀನ್ಯತೆಗಳ ವಿಸ್ತರಣೆಗೆ GMU ಆದ್ಯತೆ ನೀಡಲಿದೆ. ಜಾಗತಿಕ ಆರೋಗ್ಯ ಕ್ಷೇತ್ರದಲ್ಲಿ ಆಗುತ್ತಿರುವ ಬದಲಾವಣೆಗಳಿಗೆ ತಕ್ಕಂತೆ ಪದವೀಧರರನ್ನು ಸಿದ್ಧಪಡಿಸಲು ವಿಶ್ವವಿದ್ಯಾಲಯದ ಕಾಲೇಜುಗಳು ಬಹುಶಿಸ್ತೀಯ ವಾತಾವರಣವನ್ನು ಒದಗಿಸುತ್ತಿವೆ.
GMU ಗೆ ದೊರೆತ ಪ್ರಮುಖ ಅಂತಾರಾಷ್ಟ್ರೀಯ ಗೌರವಗಳ ಬೆನ್ನಲ್ಲೇ ಈ ಹೊಸ ಶೈಕ್ಷಣಿಕ ವರ್ಷ ಆರಂಭವಾಗಿದೆ. ಜೂನ್ 2026 ರಲ್ಲಿ, ಯುಕೆ ಮೂಲದ ‘ಕ್ವಾಲಿಟಿ ಅಶ್ಯುರೆನ್ಸ್ ಏಜೆನ್ಸಿ ಫಾರ್ ಹೈಯರ್ ಎಜುಕೇಶನ್’ (QAA) ಸಮಗ್ರ ಅಂತಾರಾಷ್ಟ್ರೀಯ ಗುಣಮಟ್ಟ ಪರಿಶೀಲನೆ ನಡೆಸಿ, ವಿಶ್ವವಿದ್ಯಾಲಯಕ್ಕೆ ಸಾಂಸ್ಥಿಕ ಮಾನ್ಯತೆ (Institutional Accreditation) ನೀಡಿದೆ. ಈ ಮಾನ್ಯತೆಯು 2031 ರವರೆಗೆ ಚಾಲ್ತಿಯಲ್ಲಿರುತ್ತದೆ. ಪರಿಶೀಲನೆಯಲ್ಲಿ GMU ಯುರೋಪಿಯನ್ ಉನ್ನತ ಶಿಕ್ಷಣ ಕ್ಷೇತ್ರದ ಗುಣಮಟ್ಟ ಭರವಸೆಯ ಎಲ್ಲಾ 10 ಯುರೋಪಿಯನ್ ಮಾನದಂಡಗಳು ಮತ್ತು ಮಾರ್ಗಸೂಚಿಗಳನ್ನು ಯಾವುದೇ ಷರತ್ತುಗಳಿಲ್ಲದೆ ಯಶಸ್ವಿಯಾಗಿ ಪೂರೈಸಿದೆ.
ಟೈಮ್ಸ್ ಹೈಯರ್ ಎಜುಕೇಶನ್ (THE) ಸಸ್ಟೈನಬಿಲಿಟಿ ಇಂಪ್ಯಾಕ್ಟ್ ರ್ಯಾಂಕಿಂಗ್ಸ್ 2026 ರಲ್ಲಿ GMU ತನ್ನ ಜಾಗತಿಕ ಸ್ಥಾನಮಾನವನ್ನು ಮತ್ತಷ್ಟು ಬಲಪಡಿಸಿಕೊಂಡಿದ್ದು, ಜಾಗತಿಕವಾಗಿ 301–400 ಬ್ಯಾಂಡ್ನಲ್ಲಿ ಸ್ಥಾನ ಕಾಯ್ದುಕೊಂಡಿದೆ. ಜೊತೆಗೆ ವಿಶ್ವಸಂಸ್ಥೆಯ ಸುಸ್ಥಿರ ಅಭಿವೃದ್ಧಿ ಗುರಿಗಳಲ್ಲಿ (UN SDGs) ಗಮನಾರ್ಹ ಸಾಧನೆ ಮಾಡಿದೆ. ‘ಅಸಮಾನತೆಗಳ ಕಡಿತ’ ವಿಭಾಗದಲ್ಲಿ ಜಾಗತಿಕವಾಗಿ 23ನೇ ಸ್ಥಾನ, ‘ಗುಣಮಟ್ಟದ ಶಿಕ್ಷಣ’ದಲ್ಲಿ 60ನೇ ಸ್ಥಾನ ಮತ್ತು ‘ಉತ್ತಮ ಆರೋಗ್ಯ ಹಾಗೂ ಜೀವನ ಮಟ್ಟ’ ವಿಭಾಗದಲ್ಲಿ 64ನೇ ಸ್ಥಾನವನ್ನು ವಿಶ್ವವಿದ್ಯಾಲಯ ಪಡೆದುಕೊಂಡಿದೆ.
ಈ ಸಾಧನೆಗಳು ಶೈಕ್ಷಣಿಕ ಗುಣಮಟ್ಟ, ಸಂಶೋಧನೆ, ನಾವೀನ್ಯತೆ, ಕ್ಲಿನಿಕಲ್ ಶಿಕ್ಷಣ ಮತ್ತು ಸಾಮಾಜಿಕ ಪರಿಣಾಮಗಳ ಮೇಲೆ ಮುಂಬರುವ ಶೈಕ್ಷಣಿಕ ವರ್ಷದಲ್ಲೂ ನಿರಂತರ ಗಮನ ಹರಿಸಲು GMU ಗೆ ಬಲವಾದ ತಡಿಪಾಯವನ್ನು ಒದಗಿಸಿವೆ.
ವಿದ್ಯಾರ್ಥಿಗಳು ಕ್ಯಾಂಪಸ್ಗೆ ಹಿಂತಿರುಗುತ್ತಿರುವಂತೆ ಮತ್ತು ಹೊಸ ತರಗತಿಗಳ ಆರಂಭದೊಂದಿಗೆ, ವಿಶ್ವವಿದ್ಯಾಲಯವು ಭವಿಷ್ಯದ ಆರೋಗ್ಯ ರಕ್ಷಣಾ ವೃತ್ತಿಪರರು ಕಲಿಯಲು, ನಾವೀನ್ಯತೆ ಮೆರೆಯಲು ಮತ್ತು ಸಮಾಜಕ್ಕೆ ಅರ್ಥಪೂರ್ಣ ಕೊಡುಗೆ ನೀಡಲು ಸೂಕ್ತ ವಾತಾವರಣವನ್ನು ನಿರ್ಮಿಸುವತ್ತ ಗಮನಹರಿಸಿದೆ.
GMU ಪ್ರಸ್ತುತ ಏಳು ಕಾಲೇಜುಗಳನ್ನು ನಡೆಸುತ್ತಿದೆ: ಮೆಡಿಸಿನ್, ಡೆಂಟಿಸ್ಟ್ರಿ, ಹೆಲ್ತ್ ಸೈನ್ಸಸ್, ಫಾರ್ಮಸಿ, ನರ್ಸಿಂಗ್, ಹೆಲ್ತ್ಕೇರ್ ಮ್ಯಾನೇಜ್ಮೆಂಟ್ ಆಂಡ್ ಎಕನಾಮಿಕ್ಸ್, ಮತ್ತು ಇತ್ತೀಚೆಗೆ ಸೇರ್ಪಡೆಗೊಂಡ ‘ತುಂಬೆ ಕಾಲೇಜ್ ಆಫ್ ಮ್ಯಾನೇಜ್ಮೆಂಟ್ ಆಂಡ್ AI ಇನ್ ಹೆಲ್ತ್ಕೇರ್’. ಸಂಸ್ಥೆಯ ವ್ಯಾಪ್ತಿ ಮತ್ತು ಸಾಮರ್ಥ್ಯವು ಅಂಕಿಅಂಶಗಳಿಂದಲೂ ಸಾಬೀತಾಗುತ್ತದೆ — 45 ಮಾನ್ಯತೆ ಪಡೆದ ಕೋರ್ಸ್ಗಳು, 5,000ಕ್ಕೂ ಹೆಚ್ಚು ಪದವೀಧರರು, ಮತ್ತು 56 ದೇಶಗಳ ಅಧ್ಯಾಪಕರಿಂದ ಶಿಕ್ಷಣ ಪಡೆಯುತ್ತಿರುವ 111ಕ್ಕೂ ಹೆಚ್ಚು ರಾಷ್ಟ್ರಗಳ ವಿದ್ಯಾರ್ಥಿಗಳು ಕ್ಯಾಂಪಸ್ನಲ್ಲಿದ್ದಾರೆ. ತುಂಬೆ ಗ್ರೂಪ್ ಒಡೆತನದ 7 ಶೈಕ್ಷಣಿಕ ಆಸ್ಪತ್ರೆಗಳ ಜಾಲದ ಮೂಲಕ 3,100ಕ್ಕೂ ಹೆಚ್ಚು ತರಬೇತಿ ಹಾಸಿಗೆಗಳ ಸೌಲಭ್ಯವಿದ್ದು, ಕ್ಲಿನಿಕಲ್ ತರಬೇತಿಯು ಅತ್ಯಂತ ಬಲವಾಗಿದೆ. ಜೊತೆಗೆ 75ಕ್ಕೂ ಹೆಚ್ಚು ಅಂತಾರಾಷ್ಟ್ರೀಯ ವಿಶ್ವವಿದ್ಯಾಲಯಗಳೊಂದಿಗೆ ಸಹಭಾಗಿತ್ವ ಹೊಂದಿದೆ. ಈ ಪ್ರದೇಶದಲ್ಲಿಯೇ ಇಂತಹ ಏಕೈಕ ಖಾಸಗಿ ಶೈಕ್ಷಣಿಕ ಆರೋಗ್ಯ ವ್ಯವಸ್ಥೆ (Academic Health System) ಇದಾಗಿದ್ದು, 2025 ರಲ್ಲಿ ‘ಟೈಮ್ಸ್ ಹೈಯರ್ ಎಜುಕೇಶನ್ ಇಂಪ್ಯಾಕ್ಟ್ ರ್ಯಾಂಕಿಂಗ್ಸ್’ನಲ್ಲಿ ಯುಎಇ ವಿಶ್ವವಿದ್ಯಾಲಯಗಳ ಪೈಕಿ ‘ಉತ್ತಮ ಆರೋಗ್ಯ ಮತ್ತು ಜೀವನ ಮಟ್ಟ’ ವಿಭಾಗದಲ್ಲಿ ಪ್ರಥಮ ಸ್ಥಾನ ಪಡೆದಿತ್ತು.
‘ಗಲ್ಫ್ ಮೆಡಿಕಲ್ ಕಾಲೇಜ್’ ಆಗಿ ಪ್ರಯಾಣ ಆರಂಭಿಸಿದ ಈ ಸಂಸ್ಥೆಯು, ಇಂದು ಶಿಕ್ಷಣ, ಆರೋಗ್ಯ ಸೇವೆ ಮತ್ತು ಸಂಶೋಧನೆಗಳನ್ನು ಒಳಗೊಂಡ ಸಮಗ್ರ ವಿಶ್ವವಿದ್ಯಾಲಯವಾಗಿ ಹಾಗೂ ಶೈಕ್ಷಣಿಕ ಆರೋಗ್ಯ ವ್ಯವಸ್ಥೆಯಾಗಿ ಬೆಳೆದಿದೆ. GMU ತನ್ನ ವಿವಿಧ ಕಾಲೇಜುಗಳ ಮೂಲಕ ಹಲವು ಕೋರ್ಸ್ಗಳನ್ನು ಒದಗಿಸುತ್ತಿದ್ದು, ಜಗತ್ತಿನಾದ್ಯಂತ ವಿದ್ಯಾರ್ಥಿಗಳನ್ನು ಆಕರ್ಷಿಸುವ ಮೂಲಕ ಅಂತಾರಾಷ್ಟ್ರೀಯ ಶೈಕ್ಷಣಿಕ ಸಮುದಾಯವನ್ನು ನಿರ್ಮಿಸಿದೆ.
ಫೋಟೋ ವಿವರಣೆ (Photo Caption):
2026–2027ರ ಶೈಕ್ಷಣಿಕ ವರ್ಷದ ಪ್ರಾರಂಭೋತ್ಸವದ ಸಂದರ್ಭದಲ್ಲಿ ಗಲ್ಫ್ ಮೆಡಿಕಲ್ ಯೂನಿವರ್ಸಿಟಿಯ ವಿವಿಧ ಕಾಲೇಜುಗಳ ಮುಖ್ಯಸ್ಥರೊಂದಿಗೆ ತುಂಬೆ ಗ್ರೂಪ್ನ ಸಂಸ್ಥಾಪಕ ಅಧ್ಯಕ್ಷರಾದ ಡಾ. ತುಂಬೆ ಮೊಯ್ದಿನ್
