ಇತ್ತೀಚಿನ ಸುದ್ದಿ
Good News | ಮಂಗಳೂರಿಗೆ ಬಂತು ಅಮೆರಿಕದಿಂದ ಎಲ್‌ಪಿಜಿ ಹೊತ್ತ ಹಡಗು: ಬಂದರಿನ 13ನೇ ಬರ್ತ್‌ನಲ್ಲಿ ಲಂಗರು
23/03/2026, 11:40
ಮಂಗಳೂರು(reporterkarnataka.com): ಅಡುಗೆ ಅನಿಲಕ್ಕಾಗಿ ಕರಾವಳಿ ಜನತೆ ಪರದಾಡುತ್ತಿರುವಾಗ ಒಂದು ಗುಡ್ ನ್ಯೂಸ್ ಸಿಕ್ಕಿದೆ.
ಅಮೆರಿಕದ ಟೆಕ್ಸಾಸ್‌ನಿಂದ ದ್ರವೀಕೃತ ಪೆಟ್ರೋಲಿಯಂ ಅನಿಲ (ಎಲ್‌ಪಿಜಿ) ತುಂಬಿಕೊಂಡು ಬಂದ ಹಡಗು ಮುಂಜಾನೆ ನವಮಂಗಳೂರು ಬಂದರಿನಲ್ಲಿ ಲಂಗರು ಹಾಕಿದೆ. ಇದರೊಂದಿಗೆ ಅನಿಲ ಸರಬರಾಜಿನ ಬಿಗು ಪರಿಸ್ಥಿತಿ ತುಸು ನಿರಾಳಗೊಳ್ಳುವ ನಿರೀಕ್ಷೆ ಮೂಡಿದೆ.
‘ಪಿಕ್ಸಿಸ್ ಪಯೋನೀರ್’ ಹೆಸರಿನ ಈ ಹಡಗು ಫೆ.14ರಂದು ಟೆಕ್ಸಾಸ್‌ನಿಂದ 16,000 ಮೆಟ್ರಿಕ್ ಟನ್ ಎಲ್‌ಪಿಜಿ ಅನಿಲದೊಂದಿಗೆ ಯಾನ ಆರಂಭಿಸಿತ್ತು. ಮೊದಲಿಗೆ ಅದು ಗುಜರಾತ್‌ಗೆ ಬಂದು ಅಲ್ಲಿಂದ ನವಮಂಗಳೂರು ಬಂದರಿಗೆ ಆಗಮಿಸಿದೆ. ಏಜಿಸ್ ಎಂಬ ಖಾಸಗಿ ಕಂಪನಿಗೆ ಎಲ್‌ಪಿಜಿ ಹೊತ್ತು ತಂದ ಕಾರ್ಗೋ ಹಡಗು ಇದಾಗಿದೆ. ಇದು ಈಗ ಮಂಗಳೂರು ಬಂದರಿನೊಳಗಿನ 13ನೇ ಬರ್ತ್‌ನಲ್ಲಿ ಲಂಗರು ಹಾಕಿದೆ. 12 ತಾಸುಗಳಲ್ಲಿ ಇದರಿಂದ ಅನ್‌ಲೋಡಿಂಗ್ ಪ್ರಕ್ರಿಯೆ ಪೂರ್ಣಗೊಳ್ಳಲಿದೆ. ಮಂಗಳೂರಿನ ತಣ್ಣೀರುಬಾವಿ ಬಳಿ ಇರುವ ಘಟಕದಲ್ಲಿ ಈ ಅನಿಲವನ್ನು ಸಂಗ್ರಹಿಸಿ, ಅಲ್ಲಿಂದ ಮಾರಾಟ/ವಿತರಣೆ ನಡೆಸಲಾಗುತ್ತದೆ ಎಂದು ತಿಳಿದು ಬಂದಿದೆ.
