ಇತ್ತೀಚಿನ ಸುದ್ದಿ
Sulia | ಪೆರಾಜೆ: ಕೆರಳಿದ ಕಣಜದ ಹಿಂಡು ಕಚ್ಚಿ ತೀವ್ರ ಗಾಯಗೊಂಡಿದ್ದ ಕೃಷಿಕ ಆಸ್ಪತ್ರೆಯಲ್ಲಿ ಸಾವು
22/05/2026, 18:04
ಸುಳ್ಯ(reporterkarnataka.com): ಅರಂತೋಡು ಸಮೀಪದ ಪೆರಾಜೆ ಗ್ರಾಮದ ಹೊದ್ದೆಟ್ಟಿ ಎಂಬಲ್ಲಿ ಅತ್ಯಂತ ದುರದೃಷ್ಟಕರ ಘಟನೆಯೊಂದು ಸಂಭವಿಸಿದ್ದು, ಕಣಜದ ಹುಳುಗಳ ಹಿಂಡು ದಾಳಿ ನಡೆಸಿದ ಪರಿಣಾಮ ವ್ಯಕ್ತಿಯೊಬ್ಬರು ಮೃತಪಟ್ಟಿದ್ದಾರೆ.
ಕೃಷಿ ತೋಟದಲ್ಲಿ ಕೆಲಸ ನಿರತರಾಗಿದ್ದ ಜಗದೀಶ್ ಎಂಬುವವರೇ ಈ ಕಣಜದ ಹುಳುಗಳ ಭೀಕರ ದಾಳಿಗೆ ಸಿಲುಕಿ ಅಕಾಲಿಕ ಮರಣ ಹೊಂದಿದ ದುರ್ದೈವಿಯಾಗಿದ್ದಾರೆ. ಮೃತ ಜಗದೀಶ್ ಅವರು ತಮ್ಮ ತೋಟದ ಜಾಗದಲ್ಲಿ ಕಳೆ ಕಟಾವು ಯಂತ್ರದ (ಗ್ರಾಸ್ ಕಟ್ಟರ್) ಸಹಾಯದಿಂದ ಕಾಡು ಮತ್ತು ಅನಗತ್ಯ ಗಿಡಗಂಟಿಗಳನ್ನು ಕಡಿಯುವ ಕಾಯಕದಲ್ಲಿ ತೊಡಗಿದ್ದರು. ಈ ಸಂದರ್ಭದಲ್ಲಿ ಪೊದೆಯಲ್ಲಿದ್ದ ಕಣಜದ ಗೂಡಿಗೆ ಯಂತ್ರವು ತಗುಲಿದ ಪರಿಣಾಮ ಕೆರಳಿದ ನೂರಾರು ಕಣಜದ ಹುಳುಗಳ ಗುಂಪು ಒಮ್ಮೆಲೇ ಜಗದೀಶ್ ಅವರ ಮೇಲೆರಗಿ ದೇಹದಾದ್ಯಂತ ಮನಬಂದಂತೆ ಕಚ್ಚಿ ತೀವ್ರವಾಗಿ ಗಾಯಗೊಳಿಸಿವೆ.
ದಾಳಿಯಿಂದಾಗಿ ತೀವ್ರ ಅಸ್ವಸ್ಥಗೊಂಡು ಜಾಗದಲ್ಲೇ ಕುಸಿದು ಬಿದ್ದಿದ್ದ ಇವರನ್ನು ತೋಟದ ಬಳಿಯಿದ್ದ ಸ್ಥಳೀಯರು ಗಮನಿಸಿ, ಕೂಡಲೇ ರಕ್ಷಣೆಗೆ ಧಾವಿಸಿ ಸುಳ್ಯದ ಸರ್ಕಾರಿ ಆಸ್ಪತ್ರೆಗೆ ತುರ್ತಾಗಿ ದಾಖಲಿಸಿದ್ದರು. ಆದರೆ ದೇಹದಾದ್ಯಂತ ಕಣಜದ ವಿಷದ ಪ್ರಭಾವ ತೀವ್ರವಾಗಿದ್ದರಿಂದ ಆಸ್ಪತ್ರೆಯಲ್ಲಿ ನೀಡಿದ ಯಾವುದೇ ಚಿಕಿತ್ಸೆಗಳು ಫಲಕಾರಿಯಾಗದೆ ಜಗದೀಶ್ ಅವರು ಕೊನೆಯುಸಿರೆಳೆದಿದ್ದಾರೆ ಎಂದು ವೈದ್ಯಕೀಯ ಮೂಲಗಳು ತಿಳಿಸಿವೆ.
