ಇತ್ತೀಚಿನ ಸುದ್ದಿ
ಕೊಡಗು: ಎಸ್ಟೇಟ್ ಮಾಲೀಕನ ಶೋಷಣೆ; ದಯಾ ಮರಣ ಕೋರಿ ರಾಷ್ಟ್ರಪತಿಗೆ ಪತ್ರ ಬರೆದ ಕಾರ್ಮಿಕ!
18/03/2022, 11:58
ಮಡಿಕೇರಿ(reporterkarnataka.com): ಎಸ್ಟೇಟ್ ಮಾಲೀಕರಿಂದ ಶೋಷಣೆಗೆ ಒಳಗಾಗಿರುವ ಕೊಡಗಿನ ಎಸ್ಟೇಟ್ ಕಾರ್ಮಿಕರೊಬ್ಬರು ದಯಾ ಮರಣ ಕೋರಿ ರಾಷ್ಟ್ರಪತಿ ರಾಮನಾಥ್ ಕೋವಿಂದ್ ಅವರಿಗೆ ಪತ್ರ ಬರೆದಿದ್ದಾರೆ.
ವೃತ್ತಿಯಲ್ಲಿ ಚಾಲಕರಾಗಿರುವ ಸುಬ್ರಮಣಿ ಅವರು ಸುಮಾರು 25 ವರ್ಷಗಳಿಂದ ಎ.ಮುತ್ತಯ್ಯ ಮಾಲೀಕತ್ವದ ಮಸ್ಕಲ್ ಎಸ್ಟೇಟ್‌ನಲ್ಲಿ ಕೆಲಸ ಮಾಡುತ್ತಿದ್ದರು. ಇವರು ಕುಟುಂಬ ಸಮೇತ ಎಸ್ಟೇಟ್ ಲೈನ್ ಮನೆಯಲ್ಲಿ ವಾಸವಿದ್ದು, ಅವರ ಪುತ್ರಿ ಪವಿತ್ರಾ ಕೂಡ ಅದೇ ಎಸ್ಟೇಟ್ ನಲ್ಲಿ ಕೆಲಸಕ್ಕೆ ಸೇರಿದ್ದರು. ಆದರೆ, ತಂದೆ-ಮಗಳಿಬ್ಬರನ್ನು ನೋಟಿಸ್ ನೀಡದೆ ಕೆಲಸದಿಂದ ವಜಾ ಮಾಡಲಾಗಿದ್ದು, ಮಾಲೀಕರು ತಮಗೆ ಬರಬೇಕಾದ ಪೂರ್ಣ ಸಂಬಳ ನೀಡಿಲ್ಲ ಎಂದು ಆರೋಪಿಸಲಾಗಿದೆ.
ಈ ಸಂಬಂಧ ಸುಬ್ರಮಣಿ ಅವರು ನ್ಯಾಯಾಲಯದಲ್ಲಿ ಮೊಕದ್ದಮೆ ಹೂಡಿದ್ದು, ಆರು ವರ್ಷಗಳಿಂದ ಮಡಿಕೇರಿ ನ್ಯಾಯಾಲಯದಲ್ಲಿ ವಿಚಾರಣೆ ನಡೆಯುತ್ತಿದೆ. ಪ್ರಕರಣ ಬಾಕಿ ಇರುವ ಕಾರಣ ಸುಬ್ರಮಣಿ ಮತ್ತು ಅವರ ಕುಟುಂಬ ಎಸ್ಟೇಟ್‌ನಲ್ಲಿರುವ ಲೈನ್ ಹೌಸ್‌ನಲ್ಲಿ ವಾಸಿಸಲು ಅವಕಾಶ ನೀಡುವಂತೆ ಆದೇಶಿಸಲಾಗಿದೆ. ಆದರೆ, ಜನವರಿ 7 ರಂದು ಮಾಲೀಕ ಮುತ್ತಯ್ಯ ಅವರು ಸುಬ್ರಮಣಿ ಅವರಿಗೆ ಆಶ್ರಯ ನೀಡಿದ್ದ ಲೈನ್ ಹೌಸ್‌ಗೆ ಅಡ್ಡಲಾಗಿ ರಾತ್ರೋರಾತ್ರಿ 10 ಅಡಿ ಬೃಹತ್ ಕಂದಕವನ್ನು ಅಗೆದು ನೀರು ಸರಬರಾಜು ಮತ್ತು ವಿದ್ಯುತ್ ತಂತಿಗಳನ್ನು ಕಡಿತಗೊಳಿಸಿದರು.
ಎಸ್ಟೇಟ್ ಮಾಲೀಕನ ಶೋಷಣೆಯ ವಿರುದ್ಧ ಪೊಲೀಸ್ ಪ್ರಕರಣ ದಾಖಲಿಸಲಾಗಿದೆ. ಕಳೆದ ಎರಡು ತಿಂಗಳಿನಿಂದ ಸುಬ್ರಮಣಿ ಅವರ ಮನೆಯವರು ಮನೆಯಿಂದ ಹೊರಬರಲು ಏಣಿ ಬಳಸುತ್ತಿದ್ದಾರೆ.
ಈ ಎಲ್ಲಾ ಘಟನೆಗಳಿಂದ ಬೇಸತ್ತ ಸುಬ್ರಮಣಿ ಅವರು ದಯಾ ಮರಣ ಕೋರಿ ರಾಷ್ಟ್ರಪತಿ ರಾಮನಾಥ್ ಕೋವಿಂದ್ ಅವರಿಗೆ ಪತ್ರ ಬರೆದಿದ್ದಾರೆ. ಅಡುಗೆ ಅನಿಲ ಸಿಲಿಂಡರ್‌ಗಳು ಮತ್ತು ಇತರ ಭಾರವಾದ ವಸ್ತುಗಳನ್ನು ಮನೆಗೆ ವರ್ಗಾಯಿಸುವುದು ಕಷ್ಟಕರವಾಗಿದೆ ಎಂದು ಸುಬ್ರಮಣಿ ಪತ್ರದಲ್ಲಿ ತಿಳಿಸಿದ್ದಾರೆ. ”ಕೋರ್ಟಿನಲ್ಲಿ ಪ್ರಕರಣ ನಡೆಯುತ್ತಿರುವಾಗಲೇ ಲೈನ್ ಹೌಸ್ ಸುತ್ತ ಕಂದಕ ತೋಡಲಾಗಿದೆ. ನಾನು ನನ್ನ ಮಗಳು ಮತ್ತು ಅನಾರೋಗ್ಯ ಪೀಡಿತ ಹೆಂಡತಿಯನ್ನು ದುಃಖಕ್ಕೆ ತಳ್ಳಲು ಸಾಧ್ಯವಿಲ್ಲ. ನನಗೆ ದಯಾ ಮರಣಕ್ಕೆ ಅವಕಾಶ ನೀಡಿ ಎಂದು ಸುಬ್ರಮಣಿ ರಾಷ್ಟ್ರಪತಿಗಳಿಗೆ ಮನವಿ ಮಾಡಿದ್ದಾರೆ.
