ಇತ್ತೀಚಿನ ಸುದ್ದಿ
ಸಕಲೇಶಪುರ ಹೆಬ್ಬನಹಳ್ಳಿ ತೋಟದಲ್ಲಿ ಬೆಳೆದಿದೆ ಗಜ ಗಾತ್ರದ ಹಲಸು; ತೂಕ 72 ಬರೋಬ್ಬರಿ ಕೆಜಿ!!
08/07/2026, 12:28
ಹಾಸನ(reporterkarnataka.com): ಜಿಲ್ಲೆಯ ಸಕಲೇಶಪುರ ತಾಲ್ಲೂಕಿನ ಹೆಬ್ಬನಹಳ್ಳಿ ತೋಟವೊಂದರ ಹಲಸಿನ ಮರದಲ್ಲಿ 72 ಕೆ.ಜಿ. ತೂಕದ ಹತ್ತು ಹಲಸಿನ ಹಣ್ಣುಗಳು ಬಿಟ್ಟಿವೆ! ಹೆಬ್ಬನಹಳ್ಳಿಯ ಎಚ್.ಬಿ. ಪ್ರತಾಪ್ಕುಮಾರ್ ಎಂಬುವರು ತಮ್ಮ ತೋಟದ ಮರದಲ್ಲಿದ್ದ ಮೂರು ಹಲಸಿನ ಹಣ್ಣುಗಳನ್ನು ಇಲ್ಲಿಯ ಶ್ರೀನಿವಾಸ ಕನ್ವೆನ್ಷನ್ ಹಾಲ್ನಲ್ಲಿ ಮೂರು ದಿನಗಳಿಂದ ನಡೆದ ಹಲಸು ಹಾಗೂ ಮಾವು ಮೇಳದಲ್ಲಿ ಪ್ರದರ್ಶನಕ್ಕೆ ಇಟ್ಟಿದ್ದರು.ಬೃಹತ್ ಗಾತ್ರದ ಹಲಸಿನ ಹಣ್ಣುಗಳು ಎಲ್ಲರ ಗಮನ ಸೆಳೆದವು.ಮೇಳಕ್ಕೆ ಬಂದವರು ಈ ದೈತ್ಯ ಹಲಸಿನ ಹಣ್ಣುಗಳನ್ನು ನೋಡಿ ಬೆರಗಾದರು. ಒಂದು ಹಣ್ಣನ್ನು ಒಬ್ಬರ ಕೈಯಿಂದ ಎತ್ತಲು ಸಾಧ್ಯವಿಲ್ಲ. ಕನಿಷ್ಠ ಇಬ್ಬರು ಬೇಕು.
‘ಇಷ್ಟು ಗಜಗಾತ್ರದ ಹಲಸಿನ ಹಣ್ಣುಗಳನ್ನು ನಾನು ನೋಡಿಯೇ ಇಲ್ಲ’ ಎಂದು ಹಿರಿಯ ಸಹಾಯಕ ತೋಟಗಾರಿಕಾ ನಿರ್ದೇಶಕ ಬಿ.ಇ. ಭಾನುಪ್ರಕಾಶ್ ಅಚ್ಚರಿ ವ್ಯಕ್ತಪಡಿಸಿದರು. ಪ್ರತಾಪ್ ಅವರ ತೋಟಕ್ಕೂ ಹೋಗಿ ಮರದಲ್ಲಿದ್ದ ಇಷ್ಟೇ ಗಾತ್ರದ ಏಳು ಹಣ್ಣುಗಳ ವಿಡಿಯೊ ಮಾಡಿಕೊಂಡು ಬಂದಿದ್ದಾರೆ.
‘54.43 ಕೆ.ಜಿ. ತೂಕದ ಹಲಸಿನ ಹಣ್ಣು ಇದುವರೆಗಿನ ಜಗತ್ತಿನ ಅತಿ ದೊಡ್ಡ ಹಣ್ಣು ಎಂದು ಗೂಗಲ್ ಮಾಹಿತಿ ಹೇಳುತ್ತದೆ. ಹೆಬ್ಬನಹಳ್ಳಿ ಪ್ರತಾಪ್ ಪ್ರದರ್ಶನಕ್ಕೆ ಇಟ್ಟಿದ್ದ ಹಲಸಿನ ಹಣ್ಣುಗಳು 72 ಕೆ.ಜಿ. ತೂಗುತ್ತವೆ. ತೋಟಗಾರಿಕಾ ಇಲಾಖೆಯಲ್ಲಿ ಇಷ್ಟು ತೂಕದ ಹಲಸಿನ ಹಣ್ಣಿನ ತಳಿ ಇಲ್ಲ. ಜಗತ್ತಿನ ಅತಿ ದೊಡ್ಡ ಹಾಗೂ ಹೆಚ್ಚು ತೂಕದ ಹಲಸಿನ ಹಣ್ಣುಗಳು ಇವೇ ಇರಬಹುದೇ ಎಂಬುದನ್ನು ಪರಿಶೀಲಿಸುತ್ತಿದ್ದೇವೆ. ಒಂದು ವೇಳೆ, ಈ ಹಣ್ಣುಗಳ ತೂಕ, ಗಾತ್ರವೇ ದೊಡ್ಡದು ಎಂದು ಸಾಬೀತಾದರೆ ಹೆಬ್ಬನಹಳ್ಳಿಯ ದೈತ್ಯ ಹಲಸಿನ ಹಣ್ಣುಗಳು ದಾಖಲೆ ಪುಸ್ತಕ ಸೇರಲಿವೆ’ ಎಂದರು.
