ಇತ್ತೀಚಿನ ಸುದ್ದಿ
ವಾಮಂಜೂರು- ಗಂಜಿಮಠ: ಉದ್ಯೋಗಕ್ಕಾಗಿ ಪಾದಯಾತ್ರೆ; 12 ಕಿಮೀ ಕಾಲ್ನಡಿಗೆ ಜಾಥಾ
14/03/2022, 12:04
ಮಂಗಳೂರು(reporterkarnataka.com): ಭಾರತ ಪ್ರಜಾಸತ್ತಾತ್ಮಕ ಯುವಜನ ಫೆಡರೇಷನ್ (ಡಿವೈಎಫ್ಐ) ಗುರುಪುರ ವಲಯ ಸಮಿತಿ ಆಶ್ರಯದಲ್ಲಿ ಉದ್ಯೋಗ ಸೃಷ್ಟಿಸಿ ಸ್ಥಳೀಯರಿಗೆ ಆದ್ಯತೆ ಒದಗಿಸಿ ಎಂಬ ಘೋಷಣೆಯಡಿಯಲ್ಲಿ ಉದ್ಯೋಗದ ಹಕ್ಕಿಗಾಗಿ ಪಾದಯಾತ್ರೆ ವಾಮಂಜೂರು ಜಂಕ್ಷನ್ ನಿಂದ ಗಂಜಿಮಠದವರೆಗೆ ನಡೆಯಿತು.
ಯುವಜನ ಪಾದಯಾತ್ರೆಯನ್ನು ಉದ್ದೇಶಿಸಿ ಡಿವೈಎಫ್ಐನ ದಕ್ಷಿಣ ಕನ್ನಡ ಜಿಲ್ಲಾ ಕಾರ್ಯದರ್ಶಿ ಸಂತೋಷ್ ಬಜಾಲ್ ಮಾತನಾಡಿ, ನಿರುದ್ಯೋಗದಲ್ಲಿ ಸ್ವತಂತ್ರ ಭಾರತ ಎಂದೂ ಕಂಡುಕೇಳರಿಯದ ಭೀಕರ ಸ್ವರೂಪ ತಳೆದಿದೆ. ನಿರುದ್ಯೋಗಿಗಳಿಲ್ಲದ ಕುಟುಂಬಗಳೇ ಇಲ್ಲ ಎಂಬ ಸ್ಥಿತಿ ನಿರ್ಮಾಣಗೊಂಡಿದೆ. ವಿದ್ಯಾವಂತ ಯುವ ಜನರ ಭವಿಷ್ಯ ಅತಂತ್ರಗೊಂಡಿದೆ, ಅವರ ಶಿಕ್ಷಣಕ್ಕಾಗಿ ತಮ್ಮ ಬದುಕನ್ನೇ ಧಾರೆಯೆರೆದ ಪೋಷಕರ ಕನಸು ಭಗ್ನಗೊಂಡಿವೆ. ದಕ್ಷಿಣ ಕನ್ನಡ ಜಿಲ್ಲೆಯು ಇದಕ್ಕೆ ಹೊರತಾಗಿಲ್ಲ ವರ್ಷಕ್ಕೆ 35 ಸಾವಿರ ವಿದ್ಯಾರ್ಥಿಗಳು ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಪದವಿ ಪಡೆದು ಹೊರಬರುತ್ತಿದ್ದರೂ ಅವರಿಗೆ ಉದ್ಯೋಗ ದೊರಕುತ್ತಿಲ್ಲ. ಜಿಲ್ಲೆಯಲ್ಲಿ ಹಲವು ಬೃಹತ್ ಕೈಗಾರಿಕೆಗಳು ಕಾರ್ಯಾಚರಿಸುತ್ತಿದ್ದರೂ ಉದ್ಯೋಗ ಸೃಷ್ಟಿಸುವಲ್ಲಿ ಅವುಗಳು ಹಿಂದೆ ಬಿದ್ದಿವೆ. ಇರುವ ಉದ್ಯೋಗವಕಾಶ ಗಳಲ್ಲಿಯೂ ಸ್ಥಳೀಯರಿಗೆ ಅವಕಾಶಗಳಿಲ್ಲ . ಹಾಗಾಗಿ ಡಿವೈಎಫ್ಐ ಸರೋಜಿನಿ ಮಹಿಷಿ ವರದಿಯನ್ನು ಸಮಗ್ರವಾಗಿ ಜಾರಿಗೊಳಿಸಬೇಕು ಜಿಲ್ಲೆಯಲ್ಲಿ ಉದ್ಯೋಗ ಸೃಷ್ಟಿಸಬೇಕು ಸೃಷ್ಟಿಯಾದ ಉದ್ಯೋಗದಲ್ಲಿ ಸ್ಥಳೀಯರಿಗೆ ಶೇಕಡಾ 75 ರಷ್ಟು ಮೀಸಲಿಡಬೇಕು ಎಂದು ಒತ್ತಾಯಿಸುತ್ತದೆ ಎಂದರು.
ಡಿವೈಎಫ್ಐನ ಗುರುಪುರ ವಲಯದ ಮಾಜಿ ಅಧ್ಯಕ್ಷ ಸದಾಶಿವ ದಾಸ್ ಅವರು ಡಿವೈಎಫ್ಐ ದ್ವಜವನ್ನು ಡಿವೈಎಫ್ಐ ವಾಮಂಜೂರು ಪ್ರದೇಶ ಸಮಿತಿಯ ಅಧ್ಯಕ್ಷ ದಿನೇಶ್ ಬೊಂಡಂತಿಲ ಅವರಿಗೆ ಹಸ್ತಾಂತರಿಸುವ ಮೂಲಕ ಕಾಲ್ನಡಿಗೆಗೆ ಚಾಲನೆಯನ್ನು ನೀಡಿದರು.
ಈ ಕಾಲ್ನಡಿಗೆ ಯು ಸುಮಾರು 12 ಕಿಲೋಮೀಟರ್ ಕ್ರಮಿಸಿ ಗಂಜಿಮಠ ಜಂಕ್ಷನ್ನಲ್ಲಿ ಸಮಾರೋಪಗೊಂಡಿತು. ಸಮಾರೋಪ ಸಭೆಯನ್ನುದ್ದೇಶಿಸಿ ಡಿವೈಎಫ್ಐನ ಜಿಲ್ಲಾ ಅಧ್ಯಕ್ಷ ಬಿ.ಕೆ ಇಮ್ತಿಯಾಜ್ ಮಾತನಾಡಿ, ದೇಶಕ್ಕೆ ಸ್ವಾತಂತ್ರ್ಯ ಲಭಿಸಿದ ನಂತರ ಅನೇಕ ಸರಕಾರಗಳು ಈ ಪ್ರಜಾಪ್ರಭುತ್ವ ಭಾರತದಲ್ಲಿ ಅಸ್ತಿತ್ವಕ್ಕೆ ಬಂದವು. ಆದರೆ ಈ ದೇಶದ ಯುವಜನರ ಉದ್ಯೋಗದ ಸಮಸ್ಯೆಯನ್ನು ಬಗೆಹರಿಸುವಲ್ಲಿ ಸರಕಾರಗಳ ಪ್ರಯತ್ನಗಳು ಏನೂ ಸಾಲದಾದವು. ಪ್ರಸ್ತುತ ಇರುವ ಸರಕಾರ 2014ರಲ್ಲಿ ಮೋದಿ ನೇತೃತ್ವದಲ್ಲಿ ಅಧಿಕಾರಕ್ಕೆ ಬಂದ ನಂತರ ಇಲ್ಲಿನ ಉದ್ಯೋಗದ ಸಮಸ್ಯೆ ಉಲ್ಬಣಗೊಳ್ಳುತ್ತಾ ಸಾಗಿದೆ. ಯುವಜನರ ನಿರುದ್ಯೋಗದ ಸಮಸ್ಯೆಯನ್ನೇ ದಾಳವಾಗಿ ಇಟ್ಟುಕೊಂಡು ವರುಷಕ್ಕೆ 2 ಕೋಟಿ ಉದ್ಯೋಗದ ಭರವಸೆಯೊಂದಿಗೆ ಅಧಿಕಾರಕ್ಕೆ ಬಂದ ಮೋದಿ ಸರಕಾರ ಉದ್ಯೋಗ ಸೃಷ್ಟಿಸುವಲ್ಲಿ ಗಮನಹರಿಸುತ್ತಿಲ್ಲ. ಇರುವ ಸರಕಾರಿ ಸ್ವಾಮ್ಯದ ಉದ್ದಿಮೆಗಳೂ ಕೂಡ ಮುಚ್ಚಲ್ಪಡುತ್ತಿವೆ. ಅನೇಕ ಸರಕಾರಿ ಉದ್ದಿಮೆಗಳನ್ನು ಖಾಸಗಿಯವರಿಗೆ ಮಾರಾಟ ಮಾಡಲಾಗುತ್ತಿದೆ. ಕೇವಲ ಕರ್ನಾಟಕದ ಸರಕಾರಿ ಇಲಾಖೆಗಳಲ್ಲಿ ಎರಡುವರೆ ಲಕ್ಷ ಉದ್ಯೋಗಗಳು ಖಾಲಿ ಇವೆ ಇವುಗಳನ್ನು ಬರ್ತಿ ಮಾಡುವಲ್ಲಿ ಮತ್ತು ಹೊಸ ಉದ್ಯಮಗಳನ್ನು ಸೃಷ್ಟಿಸುವಲ್ಲಿ ಸರಕಾರವು ಗಮನಹರಿಸುತ್ತಿಲ್ಲ ಬದಲಾಗಿ ಯುವಜನರ ಪ್ರಶ್ನೆಗಳನ್ನು ಮರೆಮಾಚಿ ಯುವಜನರ ತಲೆಯಲ್ಲಿ ಧರ್ಮದ ಅಮಲನ್ನು ಬಿತ್ತಲಾಗುತ್ತಿದೆ ಎಂದರು.
ಈ ಕಾಲ್ನಡಿಗೆಯಲ್ಲಿ ಕಾರ್ಮಿಕ ಮುಖಂಡರುಗಳಾದ ಕೆ ಗಂಗಯ್ಯ ಅಮಿನ್, ಕೆ.ಮುಂಡಪ್ಪ, ಗೋಪಾಲ ಮೂಲ್ಯ, ಡಿವೈಎಫ್ಐ ಮುಖಂಡರುಗಳಾದ ದಿನೇಶ್ ಬೊಂಡಂತಿಲ, ಚಂದ್ರಹಾಸ್ ತಾರಿಗುಡ್ಡೆ, ವಸಂತಿ ಕುಪ್ಪೆಪದವು, ನೋಡಯ್ಯ ಗೌಡ ಉಪಸ್ಥಿತರಿದ್ದರು.
