ಇತ್ತೀಚಿನ ಸುದ್ದಿ
ಮಾಯದ ಅಪ್ಪೆನ ತುಳು ಸಿನಿಮಾ ‘ಕಾರ್ನಿಕದ ಕಲ್ಲುರ್ಟಿ’: ಕಾಯ ಬುರ್ದು ಮಾಯಗ್ ಸೇರಿನ ತಗೆತಂಗಡಿ
02/11/2021, 18:19
ಮಂಗಳೂರು(reporterkarnataka.com); ಪುದರ್ ಕೇನ್ನಗನೆ ಮೈ ಇರ್ಮೆನ ಆಪುಂಡು. ಭಕ್ತಿಭಾವ ಮೂಡುಂಡು. ನನ ಆ ಮಾಯದ ಅಪ್ಪೆನ ಕಾರ್ನಿಕದ ಸಿನೆಮಾ ಎಂಚ ಇಪ್ಪು ಪಂದ್ ಕಾರ್ಲದ ರಾಧಿಕಾ ಟಾಕೀಸ್ ಗು ಪೋದು ತೂನಗ ಗೊತಾಂಡ್ ಕಲ್ಲುರ್ಟಿ ಅಪ್ಪೆನ ಶಕ್ತಿದ ಭಕ್ತಿ.
ಕಾರ್ಲಡ್ ಮೆರೆದಿನ ಅರಸೆರೆನ ನಂಜಿ ಮತ್ಸರಗ್ ಬಲಿಯಾಯಿನ ರಡ್ ಜನ ತಗೆತಂಗಡಿ ಕಾಯ ಬುರ್ದು ಮಾಯಗ್ ಸೇರಿನ ಕಥೆನ್ ಸಂದಿಪಾರ್ದನದ ಆಧಾರಡ್ ಸಿನಿಮಾದ ನಿರ್ದೇಶಕೆ ಆಯಿನ *ಮಹೇಂದ್ರ ಕುಮಾರ್* ಬಾರಿಪೊರ್ಲುಡೆ ಮುಡೆತ್ತೆರ್.
‘ಕಾರ್ನಿಕದ ಕಲ್ಲುರ್ಟಿ’ಸಿನಿಮಾಡ್ ಆಧುನಿಕ ಭಾಷೆಲೆನ ಲವಲೇಷ ಇಜ್ಜಾಂದೆ ಸಂಪೂರ್ಣ ಗ್ರಾಮ್ಯ ತುಳುಭಾಷೆದ ಸಂಭಾಷಣೆಡ್ ನಮ್ಮ ಸಮೃದ್ಧವಾಯಿನ ತುಳುಭಾಷೆದ ಪೊರ್ಲುತಿರ್ಲ್ ತೆರಿಪಾದ್ ಕೊರ್ತೆರ್. ಅಂಚೆನೆ ಆಧುನಿಕ ವಸ್ತುಲೆನ ಜಂಜಾಟ ಇಜ್ಜಾಂದೆ ಪಿರಾಕುದ ಗ್ರಾಮೀಣ ಶೈಲಿಡ್ ಹಳ್ಳಿದ ಚಿತ್ರಣ ಸಿನಿಮಾಡ್ ಬಾರಿ ಪೊರ್ಲುಡು ತೊಜಪಾದೆರ್. ಒಂಜಿ ಸಿನಿಮಾಡ್ ಮುಖ್ಯವಾಯಿನಿ ಪದ ಅಂಚೆನೆ ಹಿನ್ನೆಲೆ ಸಂಗೀತ. ಇಂಪಾಯಿನ ಬಾರಿ ಪೊರ್ಲುದ ಮೂಜಿ ಪದಕುಲ್ ಬರೆತಿನರೆನ ಸಾಹಿತ್ಯನ್ ಮಿತ್ತರ್ಮೆಗ್ ಕೊನೊಪುಂಡು. ಅಂಚೆನೆ ಅವೆಕ್ ಸ್ವರ ದಿಂಜಾಯಿನ ಸಂಗೀತ ಕಲಾವಿದೆರೆಗ್ಲಾ ಸೊಲ್ಮೆಲು.
ಸಿನಿಮಾದ ಕಲಾವಿದೆರ್ ಒರಿಯಡ್ದ್ ಒರಿ ಮುತ್ತುರತ್ನಲ್. ಅಕ್ಲೆಗ್ ಕೊರ್ತಿನ ನಟನೆ ಸಂಭಾಷಣೆಗ್ ಪೊರ್ಲುಡೆ ನಟನೆ ಮಲ್ತ್ ಸಿನಿಮಾಗ್ ಜೀವ ದಿಂಜಾದೆರ್. ತಗೆತಂಗಡಿನ ನಟನೆ ಕಣ್ಣುಡ್ ಕಣನೀರ್ ಬರ್ಪಾವುಂಡು.
ಆಯಿನಾತ್ ಬೇಗ ‘ಕಾರ್ನಿಕದ ಕಲ್ಲುರ್ಟಿ’ ಸಿನಿಮಾ ಬಿಡುಗಡೆ ಆದ್ ಪುಗರ್ತೆದ ಪುರಸ್ಕಾರ ಸಂದಡ್, ನನಾತ್ ಇಂಚಿನ ಪೊರ್ಲುದ ಸಿನೆಮಾ ನಿಕ್ಲೆನ ಕೈಟ್ ಮೂಡ್ದು ಬರಡ್ ಪಂದ್ ಕಲಾಸರಸ್ವತಿಡ ನಟ್ಟುವೆ.
-ಶಿವಂತ್ ಅನೂಪ್
