ಇತ್ತೀಚಿನ ಸುದ್ದಿ
ವೆನೆಜುವೆಲಾದಲ್ಲಿ ಪವಾಡ: ಭೀಕರ ಭೂಕಂಪ ಸಂಭವಿಸಿದ 6 ದಿನಗಳ ಬಳಿಕ ಅವಶೇಷಗಳಡಿ ಜೀವಂತ ಪತ್ತೆಯಾದ ಮಗು
01/07/2026, 14:12
ಕಾರಕಾಸ್(reporterkarnataka.com): ಭೀಕರ ಅವಳಿ ಭೂಕಂಪದಿಂದ ತತ್ತರಿಸಿರುವ ವೆನೆಜುವೆಲಾದಲ್ಲಿ ರಕ್ಷಣಾ ಕಾರ್ಯಾಚರಣೆಯ ವೇಳೆ ಪವಾಡವೊಂದು ಸಂಭವಿಸಿದೆ. ಭೂಕಂಪ ಸಂಭವಿಸಿ ಬರೋಬ್ಬರಿ ಆರು ದಿನಗಳು ಕಳೆದರೂ, ಕುಸಿದು ಬಿದ್ದಿದ್ದ ಬೃಹತ್ ಕಟ್ಟಡದ ಅವಶೇಷಗಳ ಅಡಿಯಿಂದ ಪುಟ್ಟ ಮಗುವೊಂದನ್ನು ರಕ್ಷಣಾ ಸಿಬ್ಬಂದಿ ಜೀವಂತವಾಗಿ ಹೊರತೆಗೆದಿದ್ದಾರೆ.
ಕ್ಲೈಬರ್ ಮೊರಾನ್ ಹೆಸರಿನ ಈ ಬಾಲಕನನ್ನು ಲಾ ಗ್ವೈರಾ ರಾಜ್ಯದ ‘ಲಾಸ್ ಕೊರಾಲೆಸ್ ಗಾರ್ಡನ್ 1’ ಕಟ್ಟಡದ ಅವಶೇಷಗಳ ಮಧ್ಯದಿಂದ ಮಂಗಳವಾರ ಮುಂಜಾನೆ ರಕ್ಷಿಸಲಾಗಿದೆ. ಭೂಕಂಪ ಪೀಡಿತ ಪ್ರದೇಶಗಳಲ್ಲಿ ಕಳೆದ ಆರು ದಿನಗಳಿಂದ ನಿರಂತರವಾಗಿ ರಕ್ಷಣಾ ಕಾರ್ಯಾಚರಣೆ ನಡೆಯುತ್ತಿದ್ದು, ಆರನೇ ದಿನ ಜೀವಂತವಾಗಿ ಸಿಕ್ಕ ಏಕೈಕ ವ್ಯಕ್ತಿ ಈ ಮಗುವಾಗಿದ್ದಾನೆ. ಸರಿಸುಮಾರು ಎರಡು ಅಥವಾ ಮೂರು ವರ್ಷ ಪ್ರಾಯದ ಈ ಮಗುವನ್ನು ತಕ್ಷಣವೇ ತುರ್ತು ವೈದ್ಯಕೀಯ ಚಿಕಿತ್ಸೆಗೆ ದಾಖಲಿಸಲಾಗಿದೆ ಎಂದು ವೆನೆಜುವೆಲಾದ ಹಂಗಾಮಿ ಅಧ್ಯಕ್ಷೆ ಡೆಲ್ಸಿ ರೊಡ್ರಿಗಸ್ ಅವರು ಟೆಲಿಗ್ರಾಮ್ ಸಂದೇಶದಲ್ಲಿ ತಿಳಿಸಿದ್ದಾರೆ.
ಕಳೆದ ಬುಧವಾರ ವೆನೆಜುವೆಲಾದಲ್ಲಿ ಕೇವಲ ಕೆಲವೇ ನಿಮಿಷಗಳ ಅಂತರದಲ್ಲಿ ರಿಕ್ಟರ್ ಮಾಪಕದಲ್ಲಿ 7.2 ಮತ್ತು 7.5 ತೀವ್ರತೆಯ ಎರಡು ಪ್ರಬಲ ಭೂಕಂಪಗಳು ಸಂಭವಿಸಿದ್ದವು. ಈ ನೈಸರ್ಗಿಕ ವಿಕೋಪಕ್ಕೆ ನೂರಾರು ಬಹುಮಹಡಿ ಕಟ್ಟಡಗಳು ನೆಲಸಮಗೊಂಡು, ಸಾವಿರಾರು ಜನ ಅವಶೇಷಗಳಡಿ ಹೂತುಹೋಗಿದ್ದರು. ಅವಶೇಷಗಳ ಅಡಿಯಲ್ಲಿ ಇನ್ನೂ ಯಾರಾದರೂ ಜೀವಂತವಾಗಿ ಇರುವ ಸಾಧ್ಯತೆಗಳಿದ್ದು, ನಾವು ನಮ್ಮ ಭರವಸೆಯನ್ನು ಕಳೆದುಕೊಳ್ಳದೆ ರಕ್ಷಣಾ ಕಾರ್ಯಾಚರಣೆಯನ್ನು ಮುಂದುವರಿಸಬೇಕಿದೆ ಎಂದು ನ್ಯಾಷನಲ್ ಅಸೆಂಬ್ಲಿ ಅಧ್ಯಕ್ಷ ಜಾರ್ಜ್ ರೊಡ್ರಿಗಸ್ ದೂರದರ್ಶನ ಭಾಷಣದಲ್ಲಿ ಕರೆ ನೀಡಿದ್ದಾರೆ.
ಮಕ್ಕಳಿಗಾಗಿ ಧಾವಿಸಿದ ಯುನಿಸೆಫ್ ನೆರವು ಅಂತರರಾಷ್ಟ್ರೀಯ ಮಕ್ಕಳ ತುರ್ತು ನಿಧಿ (ಯುನಿಸೆಫ್) ವರದಿಯ ಪ್ರಕಾರ, ಪ್ರಸ್ತುತ ವೆನೆಜುವೆಲಾದಾದ್ಯಂತ ಸುಮಾರು 6,80,000 ಮಕ್ಕಳಿಗೆ ತುರ್ತು ಮಾನವೀಯ ನೆರವಿನ ಅಗತ್ಯವಿದೆ. ಭೂಕಂಪದಿಂದ ಸಂತ್ರಸ್ತರಾದ ಮಕ್ಕಳು ಮತ್ತು ಅವರ ಕುಟುಂಬದ ಸಹಾಯಕ್ಕಾಗಿ ಯುನಿಸೆಫ್ ಸಂಸ್ಥೆಯು ಮಂಗಳವಾರ 47 ಮೆಟ್ರಿಕ್ ಟನ್ ತೂಕದ ತುರ್ತು ಸಾಮಗ್ರಿಗಳನ್ನು ವೆನೆಜುವೆಲಾಗೆ ರವಾನಿಸಿದೆ. ಈ ಪರಿಹಾರ ಸಾಮಗ್ರಿಗಳಲ್ಲಿ ತುರ್ತು ವೈದ್ಯಕೀಯ ಚಿಕಿತ್ಸೆಗೆ ಬೇಕಾದ ಹೆಲ್ತ್ ಕಿಟ್ಗಳು, ಸಾಂಕ್ರಾಮಿಕ ರೋಗ ತಡೆಗಟ್ಟುವ ಔಷಧಗಳು, ಸುರಕ್ಷಿತ ಹೆರಿಗೆ ಮತ್ತು ನವಜಾತ ಶಿಶುಗಳ ಆರೈಕೆಗೆ ಅಗತ್ಯವಿರುವ ವೈದ್ಯಕೀಯ ಪರಿಕರಗಳು ಸೇರಿವೆ.
ಸರ್ಕಾರದ ಅಧಿಕೃತ ಮಾಹಿತಿಯ ಪ್ರಕಾರ ಈ ಭೂಕಂಪದಲ್ಲಿ ಇದುವರೆಗೆ 1,900 ಕ್ಕೂ ಹೆಚ್ಚು ಜನ ಮೃತಪಟ್ಟಿದ್ದಾರೆ ಮತ್ತು 10,000 ಕ್ಕೂ ಹೆಚ್ಚು ಜನ ಗಾಯಗೊಂಡಿದ್ದಾರೆ. ಆದರೆ ನೈಜ ಪರಿಸ್ಥಿತಿಯೇ ಬೇರೆ ಇದ್ದು, ಕಟ್ಟಡಗಳ ಅವಶೇಷಗಳನ್ನು ತೆರವುಗೊಳಿಸಿದಂತೆ ಪ್ರತಿದಿನ ನೂರಾರು ಶವಗಳು ಪತ್ತೆಯಾಗುತ್ತಿವೆ. ಶವಾಗಾರಗಳು ಮೃತದೇಹಗಳಿಂದ ಭರ್ತಿಯಾಗುತ್ತಿದ್ದು, ಸರ್ಕಾರವು ಮೃತರ ಸಂಖ್ಯೆಯನ್ನು ಅತ್ಯಂತ ಕಡಿಮೆ ಮಾಡಿ ಹೇಳುತ್ತಿದೆ ಎಂದು ಸ್ಥಳೀಯ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಸಂತ್ರಸ್ತರ ಬದುಕು ದುಸ್ತರ ಭೂಕಂಪದಿಂದ ಬದುಕುಳಿದವರ ಸ್ಥಿತಿ ಪ್ರಸ್ತುತ ಅತ್ಯಂತ ಕರಗುವಾಗಿದ್ದು, ದೇಶದಲ್ಲಿ ದೊಡ್ಡ ಮಟ್ಟದ ಮಾನವೀಯ ಬಿಕ್ಕಟ್ಟು ತಲೆದೋರಿದೆ. ಮನೆ-ಮಠ ಕಳೆದುಕೊಂಡ ಲಕ್ಷಾಂತರ ಜನ ಕಳೆದ ಆರು ದಿನಗಳಿಂದ ಯಾವುದೇ ಆಸರೆಯಿಲ್ಲದೆ ಕಡು ಚಳಿಯಲ್ಲಿ ತೆರೆದ ಆಕಾಶದಡಿ ಅಥವಾ ಜನದಟ್ಟಣೆಯಿಂದ ಕೂಡಿದ ನೈರ್ಮಲ್ಯ ರಹಿತ ತಾತ್ಕಾಲಿಕ ಶಿಬಿರಗಳಲ್ಲಿ ರಾತ್ರಿ ಕಳೆಯುತ್ತಿದ್ದಾರೆ. ಇದು ಸಾಂಕ್ರಾಮಿಕ ರೋಗಗಳ ಹರಡುವಿಕೆಗೆ ಕಾರಣವಾಗಬಹುದು ಎಂದು ವಿಶ್ವಸಂಸ್ಥೆಯ ಆರೋಗ್ಯ ಸಂಸ್ಥೆಗಳು ಆತಂಕ ವ್ಯಕ್ತಪಡಿಸಿವೆ.
ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ (NASA) ಅಂದಾಜಿನ ಪ್ರಕಾರ, ಈ ಭೀಕರ ಭೂಕಂಪಕ್ಕೆ ವೆನೆಜುವೆಲಾದಲ್ಲಿ ಸುಮಾರು 59,000 ಕಟ್ಟಡಗಳು ಸಂಪೂರ್ಣವಾಗಿ ಧ್ವಂಸಗೊಂಡಿವೆ ಅಥವಾ ತೀವ್ರವಾಗಿ ಹಾನಿಗೊಳಗಾಗಿವೆ. ಇದರಿಂದಾಗಿ ಲಕ್ಷಾಂತರ ಜನರ ಬದುಕು ಬೀದಿಗೆ ಬಿದ್ದಂತಾಗಿದ್ದು, ಇಡೀ ದೇಶವೇ ಕಣ್ಣೀರಿನಲ್ಲಿ ಮುಳುಗಿದೆ.
