ಇತ್ತೀಚಿನ ಸುದ್ದಿ
ಹವಾಮಾನ ವೈಪರೀತ್ಯ; ಭಾರತ ಸೇರಿದಂತೆ ಹಲವು ರಾಷ್ಟ್ರಗಳ ಕರಾವಳಿಗೆ ಅಪಾಯ: ಅಧ್ಯಯನ ವರದಿ ಎಚ್ಚರಿಕೆ
05/02/2022, 18:41
ಹೊಸದಿಲ್ಲಿ(reporterkarnataka.com): ಮುಂದಿನ ದಿನಗಳಲ್ಲಿ ಭಾರತದ ಕರಾವಳಿ ಸೇರಿದಂತೆ ಹಲವು ರಾಷ್ಟ್ರಗಳ ಕರಾವಳಿ ಪ್ರದೇಶಕ್ಕೆ ಗಂಡಾಂತರ ಎದುರಾಗುವ ಸಾಧ್ಯತೆಗಳಿವೆ ಎಂದು
ಕ್ಲೈಮೇಟ್ ಡೈನಾಮಿಕ್ಸ್ ಸ್ಪ್ರಿಂಗರ್ ಜರ್ನಲ್‌ನಲ್ಲಿ ಪ್ರಕಟವಾದ ಅಧ್ಯಯನ ವರದಿ ತಿಳಿಸಿದೆ.
ಹವಾಮಾನ ವೈಪರೀತ್ಯ ಮತ್ತು ಅದರಿಂದ ಅನಾಹುತ ಘಟನೆಗಳು ಪದೇಪದೇ ಸಂಭವಿಸುತ್ತಿರುವ ಬಗ್ಗೆ ತಜ್ಞರು ಎಚ್ಚರಿಕೆ ನೀಡಿದ್ದಾರೆ. ಹೊಸ ಅಧ್ಯಯನವು ವಿಶೇಷವಾಗಿ ಭಾರತದ ಕರಾವಳಿ ಪ್ರದೇಶಗಳಿಗೆ ಎಚ್ಚರಿಕೆಯನ್ನು ನೀಡಿದೆ.
ಬಂಗಾಳಕೊಲ್ಲಿ, ದಕ್ಷಿಣ ಚೀನಾ ಸಮುದ್ರ ಮತ್ತು ದಕ್ಷಿಣ ಹಿಂದೂ ಮಹಾಸಾಗರದ ಪ್ರದೇಶಗಳಾದ ಭಾರತ, ತೈವಾನ್, ಫಿಲಿಪೈನ್ಸ್, ವಿಯೆಟ್ನಾಂ, ಬ್ರಿಜಿಲ್, ಮಲೇಷ್ಯಾ, ಚೀನಾ ಮುಂತಾದ ದೇಶಗಳ ಕರಾವಳಿ ಪ್ರದೇಶಗಳ ಸಮುದಾಯಗಳು ಭವಿಷ್ಯದಲ್ಲಿ ಸಮುದ್ರದ ದೊಡ್ಡ ಅಲೆಗಳಿಂದಾಗಿ ತೊಂದರೆ ಅನುಭವಿಸಬಹುದು ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
ಸಮುದ್ರದ ಭಾರೀ ಅಲೆಯಿಂದಾಗಿ ಪ್ರವಾಹದ ಬೆದರಿಕೆಯು ಕರಾವಳಿ ತೀರದ ಸಂರಚನೆಯ ಮೇಲೆ ಪರಿಣಾಮ ಬೀರಬಹುದು, ಮೂಲಸೌಕರ್ಯಕ್ಕೆ ಹಾನಿ, ಅಂತರ್ಜಲಕ್ಕೆ ಉಪ್ಪು ನೀರಿನ ಒಳಹರಿವು ಹೆಚ್ಚುವುದು, ಬೆಳೆಗಳ ನಾಶ ಮತ್ತು ಸಾಮಾಜಿಕ-ಆರ್ಥಿಕ ಪರಿಣಾಮಗಳೊಂದಿಗೆ ವಾಸಿಸುವ ಸಮುದಾಯಗಳ ಮೇಲೆ ಪರಿಣಾಮ ಬೀರಬಹುದು ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
ಕ್ಲೈಮೇಟ್ ಡೈನಾಮಿಕ್ಸ್’ ಸ್ಪ್ರಿಂಗರ್ ಜರ್ನಲ್‌ನಲ್ಲಿ ಪ್ರಕಟವಾದ ಅಧ್ಯಯನವು, ತೀವ್ರವಾದ ಗಾಳಿಯ ಅಲೆಗಳು ಭಾರತದ ಪೂರ್ವ ಮತ್ತು ಪಶ್ಚಿಮ ಕರಾವಳಿಯ ಕರಾವಳಿ ಪ್ರದೇಶಗಳು ಅಂದರೆ ಬಂಗಾಳ ಕೊಲ್ಲಿ ಹಾಗೂ ಅರಬ್ಬೀ ಸಮುದ್ರದ ಕರಾವಳಿ ಪ್ರದೇಶಗಳು ಮತ್ತು ಹಿಂದೂ ಮಹಾಸಾಗರದ ಅಂಚಿನಲ್ಲಿರುವ ದೇಶಗಳ ಮೇಲೆ ಪ್ರವಾಹ ಮತ್ತು ತೀರ ಬದಲಾವಣೆಗಳಿಗೆ ಕಾರಣವಾಗಬಹುದು ಎಂದು ಹೇಳುತ್ತದೆ.
ಭಾರತೀಯ ತೀರಗಳನ್ನು ಅಪ್ಪಳಿಸಲಿರುವ ಭಾರೀ ಅಲೆಗಳು…
ವಿಜ್ಞಾನಿಗಳು ಭವಿಷ್ಯದ ವಿಪರೀತ ಗಾಳಿ-ತೀವ್ರವಾದ ಅಲೆಗಳು ಮತ್ತು ಗಾಳಿಯ ವೇಗ, ಸಮುದ್ರ ಮಟ್ಟದ ಒತ್ತಡ ಮತ್ತು ಸಮುದ್ರದ ಮೇಲ್ಮೈ ತಾಪಮಾನದೊಂದಿಗೆ ಅವುಗಳ ಸಂಬಂಧದ ಬಗ್ಗೆ ವಿವರವಾದ ಅಧ್ಯಯನ ನಡೆಸಿದ್ದಾರೆ.. RCP4.5 ಮತ್ತು RCP8.5 ಎಂದು ಕರೆಯಲ್ಪಡುವ ಇಂಟರ್‌ಗವರ್ನಮೆಂಟಲ್ ಪ್ಯಾನಲ್ ಆನ್ ಕ್ಲೈಮೇಟ್ ಚೇಂಜ್ (IPCC)ನಿಂದ ಯೋಜಿಸಲಾದ ಎರಡು ವಿಭಿನ್ನ ಹಸಿರುಮನೆ ಅನಿಲ ಹೊರಸೂಸುವಿಕೆ ಸನ್ನಿವೇಶಗಳ ಅಡಿಯಲ್ಲಿ ಶತಮಾನದ ಮಧ್ಯ ಮತ್ತು ಅಂತ್ಯದ ಅವಧಿಯಲ್ಲಿ ಈ ಬಗ್ಗೆ ಅಧ್ಯಯನ ನಡೆಸಲಾಯಿತು.
ದಕ್ಷಿಣ ಹಿಂದೂ ಮಹಾಸಾಗರದ ಪ್ರದೇಶವು ಜೂನ್-ಜುಲೈ-ಆಗಸ್ಟ್ ಮತ್ತು ಸೆಪ್ಟೆಂಬರ್-ಅಕ್ಟೋಬರ್-ನವೆಂಬರ್ ಅವಧಿಯಲ್ಲಿ ಗರಿಷ್ಠ ವಿಪರೀತ ಗಾಳಿ ಮತ್ತು ಸಮುದ್ರದ ಅಲೆಗಳನ್ನು ನೋಡಬಹುದು. ಮಧ್ಯ ಬಂಗಾಳ ಕೊಲ್ಲಿಯ ಮೇಲಿನ ಪ್ರದೇಶಗಳು ಶತಮಾನದ ಅಂತ್ಯದ ಪ್ರಕ್ಷೇಪಗಳಿಂದ ಹೆಚ್ಚಿನ ಗಾಳಿಯ ಪರಿಣಾಮವನ್ನು ಎದುರಿಸುತ್ತವೆ. ಅಲೆಗಳು ದಕ್ಷಿಣ ಹಿಂದೂ ಮಹಾಸಾಗರದ ಮೇಲೆ ಸುಮಾರು 1 ಮೀ ಮತ್ತು ಉತ್ತರ ಹಿಂದೂ ಮಹಾಸಾಗರ, ವಾಯವ್ಯ ಅರಬ್ಬೀ ಸಮುದ್ರ, ಈಶಾನ್ಯ ಬಂಗಾಳ ಕೊಲ್ಲಿ ಮತ್ತು ದಕ್ಷಿಣ ಚೀನಾ ಸಮುದ್ರದ ಪ್ರದೇಶಗಳಲ್ಲಿ 0.4 ಮೀಟರ್‌ಗಳಷ್ಟು ತೀವ್ರಗೊಳ್ಳುತ್ತವೆ ಎಂದು ಸಂಶೋಧಕರು ಹೇಳಿದ್ದಾರೆ.
ಏರುತ್ತಿರುವ ತಾಪಮಾನದಿಂದ ತೊಂದರೆ..
ಹವಾಮಾನ ಬದಲಾವಣೆ ಕಾರ್ಯಕ್ರಮದ (CCP) ಅಡಿಯಲ್ಲಿ ಐಐಟಿ (IIT) ಖರಗ್‌ಪುರದ ಸಾಗರಗಳ ಎಂಜಿನಿಯರಿಂಗ್ ಮತ್ತು ನೇವಲ್ ಆರ್ಕಿಟೆಕ್ಚರ್ (Ocean Engineering & Naval Architecture) ವಿಭಾಗದಿಂದ ಅತಿರಾ ಕೃಷ್ಣನ್ ಮತ್ತು ಪ್ರಸಾದ್ ಕೆ. ಭಾಸ್ಕರನ್ ಈ ಸಂಶೋಧನೆಯ ನೇತೃತ್ವ ವಹಿಸಿದ್ದರು. ಪಶ್ಚಿಮ ಉಷ್ಣವಲಯದ ಹಿಂದೂ ಮಹಾಸಾಗರದ ಮೇಲೆ ಗಾಳಿ ಮತ್ತು ಅಲೆಗಳ ಯೋಜಿತ ಬದಲಾವಣೆಯು ಸಮುದ್ರ ಮಟ್ಟದ ಒತ್ತಡದ ವ್ಯತ್ಯಾಸಗಳು ಮತ್ತು ಬೆಚ್ಚಗಿನ ಸಮುದ್ರದ ತಾಪಮಾನದಲ್ಲಿನ ಬದಲಾವಣೆಗಳೊಂದಿಗೆ ಸ್ಥಿರವಾಗಿದೆ ಎಂದು ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವಾಲಯ ಹೇಳಿದೆ.
ಡಿಸೆಂಬರ್-ಜನವರಿ-ಫೆಬ್ರವರಿ ಮತ್ತು ಜೂನ್-ಜುಲೈ-ಆಗಸ್ಟ್ ತಿಂಗಳುಗಳಲ್ಲಿ 1.5 ಮತ್ತು 2.0 ಡಿಗ್ರಿ ಸೆಲ್ಸಿಯಸ್ ನಡುವೆ ಸಮುದ್ರದ ಮೇಲ್ಮೈ ತಾಪಮಾನದಲ್ಲಿ ಗಮನಾರ್ಹ ಹೆಚ್ಚಳವನ್ನು ಅರೇಬಿಯನ್ ಸಮುದ್ರದ ಮೇಲೆ ಊಹಿಸಲಾಗಿದೆ. ಗಲ್ಫ್ ಆಫ್ ಓಮನ್ ಮತ್ತು ಪರ್ಷಿಯನ್ ಗಲ್ಫ್‌ನ ಮೇಲಿನ ಪ್ರದೇಶಗಳು ಶತಮಾನದ ಅಂತ್ಯದ ವೇಳೆಗೆ RCP8.5 ಅಡಿಯಲ್ಲಿ 2 ಡಿಗ್ರಿ ಸೆಲ್ಸಿಯಸ್‌ಗಿಂತ ಹೆಚ್ಚಿನ ತಾಪಮಾನವನ್ನು ಕಾಣಬಹುದು ಎಂದು ಪ್ರಕ್ಷೇಪಗಳು ತೋರಿಸುತ್ತವೆ.
ಹೀಗಾಗಿ ಬದಲಾಗುತ್ತಿರುವ ಹವಾಮಾನ ಮತ್ತು ಜಾಗತಿಕ ತಾಪಮಾನದೊಂದಿಗೆ ಸಂಭವನೀಯ ಸಂಪರ್ಕಗಳನ್ನು ಅರ್ಥಮಾಡಿಕೊಳ್ಳಲು ಉತ್ತರ ಹಿಂದೂ ಮಹಾಸಾಗರದ ಪ್ರದೇಶದಲ್ಲಿ ತೀವ್ರವಾದ ಗಾಳಿ-ಅಲೆಗಳ ವಿದ್ಯಮಾನದ ಕುರಿತು ಹೆಚ್ಚಿನ ಅಧ್ಯಯನಕ್ಕಾಗಿ ಸಂಶೋಧಕರು ಕರೆ ನೀಡುತ್ತಿದ್ದಾರೆ.
