ಇತ್ತೀಚಿನ ಸುದ್ದಿ
ತುಳುನಾಡ್ ಬೊಕ್ಕ ವರಮಹಾಲಕ್ಷ್ಮಿ ಪೂಜೆ ?? | ಬರವು : ಡಾ.ಅರುಣ್ ಉಳ್ಳಾಲ
20/08/2021, 09:26
ಡಾ.ಅರುಣ್ ಉಳ್ಳಾಲ್
info.reporterkarnataka@gmail.com
ಈ ಸುಕ್ರಾರ ಊರೊರ್ಮೆ ಶ್ರೀ ವರಮಹಾಲಕ್ಷ್ಮಿ ಪೂಜೆದ ಗೌಜಿ. ಈಯೋಡು ತುಳುವೆರೆಗ್‌ಲಾ ಸೋಣೊ ಆದುಪ್ಪುನ ದಿನೊಟು ಈ ಪೂಜೆ ಬೈದಿನವು ಒಂಜಿ ಸಮಾದಾರಿಕೆದ ಸಂಗತಿ.
ವರ್ಸೊರ್ಸೊಲಾ ಚಂದ್ರ ಉಗಾದಿ ಕರಿದ್ ಒಂಜಿರಡ್ಡ್ ವಾರ ಪೋಯಿನ ಬೊಕ್ಕ ಸೂರ್ಯ ಉಗಾದಿದ ಬಿಸು ಬರ್ಪುನವು. ಅಂಚಾದ್ ತುಳುವೆರೆನ ‘ಆಟಿಡ್ ಪತ್ತ್ ಪೋಪುನ’ ದುಂಬೇ ಚಂದ್ರಕಟ್ಟ್‌ದಕ್ಲೆಗ್ ‘ಶ್ರಾವಣ’ ಬರೋಂದಿತ್ತ್ಂಡ್. ಶ್ರಾವಣ ಪನ್ಪುನವು ತುಳುವೆರೆನ *ಸೋಣ* ನೇ ಆದುಪ್ಪುನೆಡ್ದಾವರ ಅವು ಎಡ್ಡೆ ಪೊಲ್ಸುದ ತಿಂಗೊಲುಂದು ನಮ್ಮ ಇಸ್ವಾಸ. ಅಂಚಾದ್ ಆಣಪರಕೆಗ್ ಶ್ರಾವಣೊದ ಸನಿಯಾರೊದ ವ್ರತೊ, ಪೊಣ್ಣಪರಕೆಗ್ ಸುಕ್ರಾರೊದ ವ್ರತೊ ಪತ್ತುನ ಕಿರಮೊ ಉಂಡು. ಶ್ರಾವಣೊಡು ಬರ್ಪಿನ ನಾಲ್ ಇಜ್ಜಿಂಡ ಐನ್ ಸುಕ್ರಾರೊಲೆನ್ *ಶ್ರಾವಣ ಶುಕ್ರವಾರ* ಪಂದೇ ಲೆತ್ತ್ ಮಾನಾವುನವು ಸಂಪ್ರದಾಯ. ಇಂಚ ವರ್ಸೊಗೊರ ಬರ್ಪಿನ ರಡ್ಡನೇ ಶ್ರಾವಣ ಶುಕ್ರವಾರ *ವರಮಹಾಲಕ್ಷ್ಮಿ ವ್ರತ ಪೂಜೆ* ಪಂದ್ ಮಲ್ಪುವೆರ್.
ಈ ಪೂಜೆ ತುಳುನಾಡ್‌ಡ್ ಇಂಚಪ್ಪ ಪುದರ್‌ಪೋಯಿನ ಒಂಜಿ ಪೊಸಕಟ್ಟ್ ಪನ್ಪುನೆಟ್ ಅಲ್ಮಾನೊನೇ ಇಜ್ಜಿ. ನಮ್ಮವುಲು ಸಾರ್ವಜನಿಕವಾದ್ ನಡಪುನ ವರಮಹಾಲಕ್ಷ್ಮಿ ಪೂಜೆಗ್ ದಿಂಜ ಪಂಡ ಪತ್ತ್ ಪದ್ನೈನ್ ವರ್ಸೊದ ಪಿನ್ನೆಲೆ ಉಪ್ಪು ಆತೆ. ಬೆಂಗಳೂರು ಸೇರಿನಂಚ ಗಟ್ಟೊದ ಮರ್ಗಿಲ್‌ಡ್ ನಡತೋಂದಿತ್ತಿನ ಕನ್ನಡ ಸಂಪ್ರದಾಯವಾಯಿನ ಈ ಪೂಜೆನ್ ಕೆಲವು ಟಿವಿ ಚಾನೆಲ್‌ದಕುಲು ಸೀದಾ ಪ್ರಸಾರೊ ಮಲ್ಪೆರೆ ಸುರು ಮಲ್ತಿನ ಬೊಕ್ಕ, ಒಂಜಾತ್ ಜೋಯಿಸೆರೆನ್ ಕುಲ್ಲಾದ್ ಐತ ಕತೆ ಇಸೇಸತೆಲೆದ ಬಗೆಟ್ ಒಂಜಾತ್ ಪುಗರ್‌ದ್ ಪಂಡೊನ್ಯೆರೆ ಸುರು ಮಲ್ತಿ ಬೊಕ್ಕ ಮುಲ್ತಕುಲುಲಾ ಮೆಲಾನೇ ಸುರು ಮಲ್ತಿನೀಂದ್ ಪನೋಲಿ. ನಾಡೊರ್ಮೆ ನಡಪುನ ಮಾತಾ ಪರ್ಬೊ – ಪೂಜೆಲು ಮೂಲುಲಾ ನಡಪುಂಡು. ಐಟ್ ಆಚಿರ ಇಜ್ಜಿ. ಆಂಡ ಅವೆಕ್ ತುಳುನಾಡ್‌ಡ್ ಮುಲ್ತನೇ ಆಯಿನ ಪ್ರತ್ಯೇಕ ವಿಧಾನ, ಪಿನ್ನೆಲೆ ಉಂಡು. ಐಕ್ ಓಲುಲಾ ದಾಂತಿನ ತುಳುತನೊಕು ಮಾತ್ರ ಸಮ್ಮಂದ ಪಡೆಯಿನ ಒಂಜಿ ಪ್ರತ್ಯೇಕ ಕಾರಣೊಲಾ ಉಪ್ಪುಂಡು. ಆಂಡ ಈ ವರಮಹಾಲಕ್ಷ್ಮಿ ಪೂಜೆಗ್‌ಲಾ ತುಳುವೆರೆನ ನಂಬೊಲಿಗೆಗ್ಲಾ ವಾ ಸಮ್ಮಂದಲಾ ಇಜ್ಜೀಂದೇ ಪನೊಲಿ. ಅಂಚಾದೇ ಉಂದು ಇಂಚಪ್ಪದ ಬುಳೆಚ್ಚಿಲ್ಂದ್ ಪನಿಯೆರೆ ನಂಕ್ ಸಾಕ್ಷಿ ತಿಕ್ಕುಂಡು.
ಚಂದ್ರಮಾನೊದ ಪೊಸವರ್ಸ ಕರಿದ್ ಒಂತೆ ದಿನೊ ಕಡೆಸ್‌ದ್ ನಮ್ಮ *ಪಗ್ಗು* ಕಡೀರಾಪುನೆಡ್ದಾವರ ಅಕ್ಲೆನ ದಿನನಡಕೆ ನಮಡ್ದ್ ಒಂತೆ ಎದ್‌ರುಪ್ಪುಂಡು. ಅಂಚಾದ್ ನಮ್ಮ ‘ಆಟಿ’ ಅಕೇರಿಯಾನಗ ಅಕ್ಲೆಗ್ ‘ಶ್ರಾವಣ’ ಮೂಜಿ ವಾರ ಕರಿದಾದುಪ್ಪುಂಡು. ಚಂದ್ರಕಟ್ಟ್‌ಡ್ ರಡ್ಡನೇ ಶ್ರಾವಣೊಡು ವರಮಹಾಲಕ್ಷ್ಮಿ ಪೂಜೆದ ಸಂಕಲ್ಪ. ಅಕುಲು ಮಲ್ಪುನೆನ್ ತೂದು ನಂಕ್ ಅವು ಶ್ರಾವಣ ಅತ್ತ್ ಪನ್ಪುನವು ತೆರಿದ್‌ಲಾ ತೆರಿಯಂದಿನ ಲೆಕ ನಮಲಾ ಆ ಪೂಜೆಡ್ ಸೇರೋಂದು ಬತ್ತ. ಮಲ್ಲೆಜ್ಜಿ, ಲೋಕೊದೆಡ್ಡೆಪುಗಾದ್ ಅಟ್ಟಣೆ ಮಲ್ಪುನ ಒವ್ವೇ ದೇಬೆರೆನ ಧರ್ಮಕಾರ್ಯೊಡು ಸೇರುನವು ತಪ್ಪತ್ತ್.
ಆಂಡ, ಆಟಿ ಸಂಕ್ರಾಂದಿ ಕರಿದ್ ಸಾನೊ ಗುಂಡೊದ ತಟ್ಟಿಬಾಕಿಲ್ ಪಾಡಿನ ನಂಕ್ ಬಾಕಿಲ್ ದೆಪ್ಪುನ ಮುಟ್ಟ ಒಂಜರ್ತೊಡು ಕಾಲ ಒಡ್ಡಾಯಿನ ಸೂತಿಕ. ಆಟಿಡ್ ಸಾನೊಡ್ ಮಾತ್ರತ್ತ್ ಒಂಜಿಲ್ಲಡ್ಲಾ ಎಡ್ಡೆ ಲೇಸ್ ಕರಿಪೆರೆ ಬಲ್ಲಿ ಪನ್ಪಿನ ತಡೆಕಟ್ಟ್ ಮಲ್ತೊಂದ. ಇಂಚ ಉಪ್ಪುನಗ ಆಟಿದ ಬಾಕಿಲ್ ಪಾಡಿನ ಸಾನೊದೆದುರುಗು ಲಕ್ಷ್ಮೀದೇವಿನ ಸಿಂಗರ್ಪುದ ಪಟೊ ದೀದ್ ಗೌಜಿ ಗಮ್ಮತ್ತ್‌ಡ್ ವರಮಹಾಲಕ್ಷ್ಮಿ ಪೂಜೆ ಕರಿಪುನವು ತುಳುವಂದ ಕಟ್ಟ್ ಪಿರ್ಕಾರ ಏತ್ ಸರಿ ? ತೆರಿನಕುಲು ಪನೊಡು.
ಇತ್ತೆನೇ ಪಂಡಿಲೆಕ,ವರಮಹಾಲಕ್ಷ್ಮಿ ಪೂಜೆ ಬರ್ಪುನವು ಶ್ರಾವಣ ಮಾಸ ರಡ್ಡನೇ ಸುಕ್ರಾರೊ. ಆಟಿ ಪತ್ತಿನಕ್ಲೆಗ್ ಅವು ಸೋಣೊಲಾ (ಶ್ರಾವಣ) ಅತ್ತ್, ಸೋಣೊದ ರಡ್ಡನೇ ಸುಕ್ರಾರೊಲಾ ಅತ್ತ್. *’ಪಾಲಿತೊನುನ ಕಟ್ಟ್ ಒಂಜಿ, ಕರಿಪುನ ಪದ್ಧತಿ ಒಂಜಿ’* ಪನ್ಪುನ ಲೆಕ ಆತ್ಂಡ್ ತುಳುವೆರೆನ ಇನಿತ ಸ್ಥಿತಿ.
ನಮ ಸಂಸ್ಕೃತಿ ಬದ್ಧ ಬುಡು ಮನಸ್ಸ್‌ಡ್ ಉಂದೆನ್ ತುಳಿತ್ತ್‌ದ್ ತೂವೊಡು. ಪ್ರಾಕ್‌ದ ವರ್ಸಾದಿದ ಕಟ್ಟ್‌ಡ್ ಇಜ್ಜಿಂಡಲಾ ಈ ವರಮಹಾಲಕ್ಷ್ಮಿ ಪೂಜೆ ಒರಿಯೆನ್ ತೂದು ಒರಿ ಸುರು ಮಲ್ತೊಂದಿನ ಪೊಸ ಸಂಪ್ರದಾಯ ಪನ್ಪುನ ಸತ್ಯೊನೇ ಅಪಗ ಬೊಲ್ಪುಗು ಬರ್ಪುಂಡು. ಇಂಚ ತೂಯಿನೆನ್ ಮಾತ ಮಲ್ಪುನಕುಲೆನ ಸಂಖ್ಯೆಲಾ ವರ್ಸೊಡ್ದ್‌ವರ್ಸೊ ಎಚ್ಚಾವೊಂದುಂಡು. ಅಕ್ಷಯ ತದಿಗೆ, ಭೀಮನ ಅಮಾವಾಸ್ಯೆ, ಗೌರೀಹಬ್ಬ, ಹೋಳಿ ಇಂಚ ಪೊಸ ಪೊಸತ್ತ್ ಸೇರೋಂದುಂಡು.
ವರಮಹಾಲಕ್ಷ್ಮಿ ಪೂಜೆಡ್ ಪೊಂಜೊವುಲೇ ಈ ಲೇಸ್‌ದ ಮುತಾಲಿಕೆ ವೈಸೊಂಡಲಾ ಗಟ್ಟೊದ ಸಂಪ್ರದಾಯ ಪಿರ್ಕಾರ ಅಕುಲೇ ಸೇರ್ದ್ ಮಲ್ಪೊಡಾಯಿನ ಪೂಜೆನ್ ಪಿರ ಆಂಜೊವೊಲೆಡ ಮಲ್ಪಾವೆರ್. ಮುಲ್ತ ಕಟ್ಟ್‌ಡ್ ಇಜ್ಜಿಂಡಲಾ ಗಟ್ಟೊದಕ್ಲೆನ್ ತೂದು ಕೈಸೇರಿನ ಪೊಣ್ಣುಪೊಂಜೊವುಲೆಗ್ ಮೋನೆ – ಕೈಲೆಗ್ ಮಂಜಲ್ ಪೂಜಿದ್, ಬಾಗಿನ, ರವಿಕೆದ ಕುಂಟು, ಕುಪ್ಪಿದ ಬಳೆ, ಕೆಂಪು ಪಟ್ಟೆ‌ನೂಲು ಕೊರ್ದು ಅಂತೂ ಪೂಜೆನೊಂಜೆನ್ ಮಲ್ತ್ ಬುಡ್ಪೆರ್. ಇಚಿತ್ರ ದಾದ ಪಂಡ – “ಈ ಪೂಜೆ ದಾದ ? ದಾಯೆ? ಎಂಚಿನ ಪಿನ್ನಲೆ ?” ಪಂದ್ ಕೇಂಡ ನಮ್ಮ ಅಕ್ಕನಕ್ಲೆಡ ಒರ್ತಿಡಲಾ ಉತ್ತರೊ ತಿಕ್ಕುಂಡು ಪನ್ಪುನ ಧೈರೊ ನಮಕಿಜ್ಜಿ. “ಆಟಿಡ್ ಬೇತೆ ಪರ್ಬೊ ದಾಂತಿನೆಕ್, ಆ ಸಂಘೊ, ಈ ಸಂಘೊದಕುಲು ಮಲ್ತೆರ್‌ಂರ್ ನಮಲಾ ಮಲ್ಪುನಿ” – ಪನ್ಪುನೊಂಜಿ ಉತ್ತರ ಮಾತ್ರ ಅಕ್ಲೆಡ ನಿರೀಕ್ಷೆ ಮಲ್ಪೊಲಿ. ಇತ್ತಿತ್ತೆ ಜಾತಿಗೊಂಜಿ ವರಮಹಾಲಕ್ಷ್ಮಿ ಪೂಜೆಲಾ ತೂಯೆರೆ ತಿಕ್ಕುವ. ಇಂಚ ಮಲ್ಪೊಡೇ ಆಂಡ ತುಳುನಾಡ ಸೋಣೊದ ರಡ್ಡನೇ ಸುಕ್ರಾರೊ ನಮ ವರಮಹಾಲಕ್ಷ್ಮಿ ಪೂಜೆ ಮಲ್ಪುಗ. ಕಟ್ಟ್‌ಲಾ ತಪ್ಪುಜ್ಜಿ, ನಂಕ್‌ಲಾ ಸಮದಾರಿಕೆ.
ಈಯೋಡು ಚಂದ್ರಕಟ್ಟ್ ಬೊಕ್ಕ ಸೂರ್ಯ ಕಟ್ಟ್‌ದ ರಡ್ಡ್ ಉಗಾದಿಲಾ ಒತ್ತೊತ್ತುಗೇ ಬತ್ತಿನೆಡ್ದಾವರ ಈ ವರ್ಸೊದ ವರಮಹಾಲಕ್ಷ್ಮಿ ಪೂಜೆ ತುಳುವರೆಗ್‌ಲಾ ‘ಸೋಣ’ ಆದುಪ್ಪುನ ದಿನೊಟೇ ಬೈದ್ಂಡ್. ಈ ಬಗೆಟ್ ಒಂತೆ ವಿವೇಚನೆ ಮಲ್ಪೆರೆ ಈ ವರ್ಸಡ್ ಉಂದೊಂಜಿ ಅವಕಾಶ ಪಂದ್ ನಮ ಎಣ್ಣೊನುಗ.
ಎಡ್ಡೆ ಉದ್ದೇಶೊದ ಕಜ್ಜೊ ಕೈಗೊನ್ನುನವು ತಪ್ಪತ್ತ್. ನಮ್ಮ ಧಾರ್ಮಿಕ ಶ್ರದ್ಧೆ ಬೊಕ್ಕ ಒತ್ತಟ್ಟ್‌ಗ್ ಅವು ಪ್ರೇರಣೆ ಕೊರ್ಪುಂಡುಂದಾಂಡ ಐಕ್ ವಿರೋಧ ಇಜ್ಜಿ. ಆಂಡ ಇನಿ ನಮ್ಮ ನಂಬೊಲಿಗೆಲು ಅಂಚಿಲಾ ಅತ್ತ್ ಇಂಚಿಲಾ ಅತ್ತ್ ಪನ್ಪುನಲೆಕ ಆತ್ಂಡ್. ಮಲ್ಪುನ ಕಾರ್ಯೊದ ಪ್ರಸ್ತುತತೆದ ಬಗೆಟ್ ಎಣ್ಮೆದಾತಾಂಡಲಾ ನಂಕ್ ಎಚ್ಚರೊ ಬೋಡು ಪನ್ಪುನೊಂಜೇ ಈ ಬರವುದ ಉದ್ದೇಶೊ.
Subscribe ARUN ULLAL YouTube channel
https://youtube.com/channel/
